Tuesday, March 12, 2013

Ang Ama ay ‘Diyos’ ni Kristo Hesus

August 30, 2003


KAHAPON ay ipinakita natin ang pagka-Diyos ni Kristo. Ngayon ay sasagutin natin itong magandang tanong si Arnel ng Tarlac.

Ganito ang sabi niya, "Mr. Cenon Bibe Jr. paano mo nasasabi na si Kristo ay diyos gayong si Kristo mismo ay may kinikilalang Diyos? Ang Ama na nasa Langit."

Salamat sa tanong mo, Arnel. May katwiran ka para magtanong ng ganyan.

Pero ipagpaumanhin mo kung sasabihin ko na ang tanong na ganyan ay dala ng limitadong kaalaman sa Bibliya at sa mga dahilan kung bakit nasulat ang mga laman nito.

Pero bago ko ipaliwanag kung bakit ko nasabi ‘yan ay basahin muna natin ang ilang talata kung saan tinatawag nga ni Kristo na "Diyos" ang Ama. Ito ang John 20:17 at Matthew 27:46.

Ganito ang sinasabi ng John 20:17, "Huwag kang kumapit sa akin dahil hindi pa ako nakakabalik sa Ama."

"Sa halip ay puntahan mo ang aking mga kapatid at sabihin mo sa kanila: Ako ay babalik sa aking Ama at sa inyong Ama, sa AKING DIYOS at sa inyong Diyos."

Ganito naman ang sinasabi sa Mt 27:46, "Noong bandang ika-siyam na oras, sumigaw si Hesus: Eli, Eli lama sabachthani? -- na ang kahulugan ay ‘DIYOS KO, DIYOS KO, bakit mo ako pinabayaan?"

Sa dalawang talata ay tinawag ni Hesus na "Diyos" ang Ama. Pero nangangahulugan ba ito na hindi Siya Diyos?

u u u

Ngayon, ipaliliwanag ko kung bakit dala ng "limitadong kaalaman sa Bibliya" ang pagsasabi na hindi Diyos si Kristo porke tinawag Niyang Diyos ang Ama.

Dapat nating malaman na ang DAHILAN kung bakit nasulat ang mga Ebanghelyo ay para IPAKITA ang mga GINAWA ni Kristo para TUBUSIN ang tao sa kasalanan.

Ang DAHILAN na ito ay IBA sa dahilan kung bakit nasulat ang ibang nilalaman ng Bibliya, tulad ng Old Testament.

Ayon sa John 5:39, ang Lumang Tipan ay nasulat upang "MAGPATOTOO" kay Hesus.

Samantala, ang Bagong Tipan, partikular ang mga Ebanghelyo, ay nasulat para tayo ay MANIWALA kay Kristo at MALIGTAS.

‘Yan nga ang sinasabi John 20:31, "Pero ang mga ito ay nasulat PARA KAYO AY MANIWALA na si Hesus ay ang KRISTO, ang Anak ng Diyos, at sa paniniwala ay magkaroon kayo ng buhay sa kanyang pangalan."

So nakikita natin na ang iba’t-ibang bahagi ng Bibliya ay may iba’t-ibang dahilan din kung bakit sila nasulat.

Kaya nga marami ang nagkakamali sa pag-unawa ng mga sinasabi ng Bibliya ay PINAGHAHALO-HALO nila ang mga sinasabi at diwa ng mga Kasulatan.

u u u

Ngayon, para maunawaan natin kung bakit tinawag ni Hesus na Diyos ang Ama, kailangang makita natin ito sa KABUOHAN ng KUWENTO ng KALIGTASAN.

Una, kinailangang maging TAO ang Diyos para MABAWI Niya ang PAG-AALIS Niya ng buhay na walang hanggan sa tao.

Noon kasing nagkasala sina Eba at Adan ay PINALAYAS sila ng Diyos sa Paraiso at hindi sila nakakain mula sa Puno ng Buhay. (Genesis 3:24)

Kaya nga may kamatayan sa mundo. (Roman 6:23)

Diyos ang NAG-ALIS ng buhay na walang hanggan kaya Diyos din lang ang puwedeng MAGBALIK nito.

Pero para mangyari ito, kinailangan na may TUMUBOS sa tao. At si Hesus ang gumawa nito.

Pahayag nga ng 1 Timothy 2:5-6, "Dahil iisa ang Diyos at iisa ang tagapamagitan sa Diyos at tao, ang taong si Kristo Hesus, na NAGBIGAY sa kanyang sarili bilang PANTUBOS PARA SA LAHAT NG TAO. Ito ang patotoo na ibinigay sa tamang panahon."

Bilang tagapamagitan kinailangan ni Hesus na MAGPAKUMBABA at MAKIISA sa tao sa kabila na Siya ay Diyos.

Kaya nga sinasabi sa Philippians 2:5-8, "Ang kaisipan ninyo ay dapat maging tulad ng kay Kristo Hesus, na kahit NASA ANYO ng DIYOS, ay hindi itinuring ang kanyang sarili bilang kapantay ng Diyos, bagay na dapat maunawaan."

"Pinawalang kabuluhan niya ang kanyang sarili at tinanggap ang pinaka kalikasan ng isang alipin at NAGING TULAD NG TAO."

"Yamang siya ay nasa anyo bilang tao, nagpakumbaba siya at naging masunurin hanggang sa kamatayan -- maging kamatayan sa krus!"

Nakikita natin dito na sa kabila ng Siya ay "NASA ANYO NG DIYOS," ang PAKIKIISA ni Hesus sa tao ay lubos.

Ganoon din naging LUBOS ang Kanyang PAGPAPAKUMBABA.

Kaya hindi kataka-taka na TAWAGIN Niyang "Diyos Ko" ang Kanyang Ama.

‘Yan ang KONTEKSTO ng mga sinabi ng Panginoon. At dahil diyan ay WALANG KONTRADIKSYON sa Kanyang pagiging Diyos.

Sa katunayan, kabaliktaran ito ng gawain ng iba riyan na pilit na NAGPAPAKA-DIYOS sa kabila na sila ay mga tao lamang.

Ang kahalagahan nito ay ipinakita ni Hesus kung gaano kahalaga ang pagpapakumbaba at pagpapasakop ng isang Kristiyano sa Diyos.

Hesus: Diyos o Tao?

August 30, 2003


SA PANAHON ngayon, dumarami ang mga religious groups na nagsasabi na ang Panginoong Hesus ay TAO LANG at hindi Diyos.

Siyempre pa, ang basehan nila ay ang Bibliya kung saan nakasulat ang buhay at kamatayan ni Hesus.

Ang sasabihin ng mga hindi naniniwala sa pagka-Diyos ni Kristo ay “Hindi siya puwedeng maging Diyos dahil marami siyang ginawa na hindi puwedeng gawin ng Diyos.”

Ang halimbawa nila ay ang pagkapanganak ni Hesus sa pamamagitan ni Maria. Sunod ang mga karanasan Niya bilang tao.

Nagugutom daw ba ang Diyos? Ang sagot nila ay “Hindi.” Pagkatapos ay babasahin nila ang Bibliya kung saan sinasabi na si Hesus ay nagutom at kumain pa nga.

Ang Diyos daw ba ay namamatay? Siyempre sasabihin nila ay “Hindi.” Tapos ay ipakikita nila sa Banal na Kasulatan na si Kristo ay naghirap, ipinako sa krus at namatay.

Sa katunayan, mabubuklat nila ang buong Bibliya at mapapatunayan na maraming katangian ang Panginoon na tanging sa tao at hindi sa Diyos. Dispuwes, sabi nila, “tao lang talaga” Siya at hindi Diyos.

Ang problema lang sa argumentong ganito ay napapaghalata na talagang napakalayo na nila sa panahon nina Hesus at ng mga sumulat ng Bibliya.

Patunay nga ito na WALA na silang KAUGNAYAN sa IGLESIA na ITINATAG ni Kristo noong UNANG SIGLO.

Dahil dito ay NALILIGAW na sila sa pag-intindi sa mga laman ng Banal na Kasulatan.

Ang hindi nila alam, ang isang layunin kung bakit isinulat ang New Testament ay para patunayan nga na “NAGING TAO” si Hesus.

Noon kasing unang panahon ay mas kinilala si Kristo bilang “DIYOS LANG” dahil sa mga himala at kababalaghan na Kanyang ipinakita noon.

Kayo ba naman ang magpalakad sa mga pilay, magsauli ng paningin sa mga bulag, magpalayas ng mga demonyo, mag-utos sa bagyo na tumigil, bumuhay ng mga patay at muling mabuhay matapos patayin sa krus ay kikilalanin din kayong Diyos.

At dahil Diyos nga si Kristo ay maraming tao ang ayaw nang maniwala na siya ay naging tao. Marami na rin noon ang ayaw maniwala na IPINAKO Siya sa Krus dahil "katitisuran" (stumbling block) nga raw ito.

Dahil sa maling paniniwala na si Hesus ay “Diyos lang,” kinailangan ng mga ebanghelista at manunulat ng Bagong Tipan na patunayan na si Kristo ay naging “TAO RIN.”

‘Yon ang dahilan kung bakit halos buong New Testament ay pilit na nagpapatunay na Siya ay “NAGING TAO.”

Ang patotoo na Siya ay nagpakatao ay nakahalo sa mga patunay rin na Siya ay nagpaka-Diyos habang narito sa lupa.

Pero kung Diyos Siya, bakit Niya sinabi na ang Ama ang “nag-iisang tunay na Diyos” tulad ng sinasabi sa John 17:3.

Sabi sa talata, “Ngayon ito ang buhay na walang hanggan na makilala Ka nila na nag-iisang tunay na Diyos …”

’Yan ang ipinagdidiinan nila. Ang Panginoon daw mismo ang nagsabi na ang Ama ang “NAG-IISANG TUNAY NA DIYOS.” Ano pa raw ba ang dapat intindihin sa mga simple at direktang salita na iyan?

Ang kaso po ay PUTOL ang binabanggit nilang talata.

Bahagi lang ng talata ang kanilang binabanggit. Hindi rin nila isinasama ang BUONG DIWA ng BUONG KASULATAN.

Sa Bibliya o kahit na ano pang babasahin o literatura, ang isang talata ay bahagi ng isang chapter o kapitulo at ang kapitulo ay bahagi ng buong aklat.

Sa katunayan, kung itutuloy lang ang John 17:3 at babasahin ang BUONG talata ay ito ang sinasabi, “Ngayon ito ang buhay na walang hanggan na makilala Ka nila na nag-iisang tunay na Diyos AT ANG IYONG SUGO SI HESU KRISTO.”

Hindi lang pala ang Ama ang dapat kilalanin kundi pati na rin si Hesu Kristo.

Ngayon, ano ba ang PAGPAPAKILALA ng Ebanghelyo ni John kay Hesus?

Basahin natin ang pinaka-UNANG TALATA ng kanyang sinulat.

Ganito ang sinasabi ng John 1:1, "Sa pasimula ay naroon ang Salita, at ang Salita ay kasama ng Diyos, at ang SALITA AY DIYOS."

Eh ano naman kung ang "SALITA AY DIYOS?"

Ang kahalagahan nito ay mababasa sa verse 14 kung saan sinasabi, "Ang SALITA ay NAGKATAWANG TAO at gumawa ng kanyang tirahan sa gitna natin."

Sa susunod na talata ay idinideklara na "Nagpatotoo si Juan [Bautista] kaugnay sa kanya. Sumisigaw siya at nagsasabi, ‘Ito siya na aking sinasabi: Ang sumusunod sa akin ay HIGIT sa akin dahil siya ay NAUNA sa akin."

Malinaw na ang tinutukoy na "SALITA" sa mga talatang ito ay si HESUS. At kung susundin natin ang sinasabi sa John 17:3 na kilalanin si Hesus ay kikilalanin natin na Siya ay DIYOS.

Ang deperensiya kasi sa mga gumagamit ng Bibliya at nagsasabi na "tao lang" si Hesus ay NAGKUKUNWARI lang sila na alam nila ang Bibliya.

Ang totoo ay HINDI NILA ALAM ang TUNAY NA DIWA ng Kasulatan dahil wala silang kaugnayan sa mga nagsulat nito na mga MIYEMBRO ng Iglesia na itinatag ni Kristo noong UNANG SIGLO.

Scapular at lucky charm pareho ba?


NABASA ni AM ng Leyte ang mga sinulat natin tungkol sa Deuterocanonica at Apocrypha at naisipan niyang mag-text.

Ganito ang sabi niya, "Hi, Cenon. Isa ako sa napakarami mong tagasubaybay ng napakaganda mong column. Itatanong ko lang kung paano malalaman kung Deuterocanonica o Apocrypha ang isang Bibliya?"

Dagdag pa niya, "Nabasa ko rin ang tungkol sa lucky charm. Paano ang iskapolaryo? Bawal din bang gamitin ‘yon?"

Salamat sa text mo, AM at sa interes mong malaman ang pagkakaiba ng Bibliya na Deuterocanonica at Apocrypha.

Mahalagang isyu ang tungkol sa pagkakaroon ng Deuterocanonica ng isang Bibliya dahil dito ay makikita natin kung TAMA o MALI ang Bibliya na gamit natin.

Kung hindi pa alam ng iba sa atin, may mga Bibliya na BINAWASAN ng mga libro kaya KULANG ang laman ng mga ito.

Ang INALIS na mga libro na ito ay ang tinatawag na DEUTEROCANONICA.

Kaya nga natutuwa ako sa interes ni AM. Ipinapakita lang nito na hangad niyang malaman kung alin ang TAMANG BIBLIYA at alin ang mali.

u u u

Kaugnay sa tanong ni AM kung paano makikilala ang Bibliyang may Deuterocanonica at alin ang Apocrypha lang ay heto po ang mga palatandaan.

Isang agarang tanda ay may NAKALAGAY na "With Deutecanonicals" o "With Apocrypha" sa pabalat ng Bibliya.

Kung makakabuklat tayo ng Bibliya na may tatak na "With Deuterocanonicals" ang mga aklat ng INALIS ng mga Protestante ay NAKAHALO o NAKASAMA sa ibang aklat sa Old Testament.

Kung ang Bibliya naman na may tatak "With Apocrypha" ang bubuklatin natin, ang mga aklat na INALIS ay NAKAHIWALAY. Usually ay nasa likod ng Bibliya.

Pangalawang pagkakaalaman ay kapag Bibliya ng Katoliko o Catholic Bible (ang tanda nito ay may KRUS sa cover) tiyak na mayroon itong Deuterocanonica.

Kung walang KRUS ang cover ng Bibliya ay malamang na ito ay sa Protestante o sa ibang grupo na gumagamit ng KULANG na Kasulatan.

Ganoon ‘yon, AM.

u u u

Tungkol naman sa lucky charm at sa ISKAPULARYO, HINDI "lucky charm" ang SCAPULAR. MAGKA-IBA ang dalawang ito.

Ano ba ang masasabing "lucky charm?"

Ito ay isang bagay o gamit na pinaglalagyan ng tiwala o kumpiyansa ng isang tao.

Sa "lucky charm," ang bagay o gamit mismo ang pinagkakatiwalaan o dito inilalagay ang pagtitiwala.
Kaya nga may mga tao na hindi makaalis ng bahay kung wala ang kanilang "lucky charm."

Sa kabilang dako, ang scapular ay isang bagay na ang layunin ay PALAGING IPAALALA sa isang tao sa PANGAKONG TULONG ng Birheng Maria sa may suot nito.

Ang kagandahan ng scapular ay mayroon itong basbas o bendisyon ng pari na kumukuha ng kapangyarihan mula mismo sa Panginoong Hesus.

Nakabatay ‘yan sa John 20:21-22 na ganito ang sabi, "Muli ay sinabi sa kanila ni Hesus: Sumainyo ang kapayapaan! Kung paanong sinugo ako ng Ama ay SINUSUGO ko rin kayo."

"Pagkasabi noon ay HUMINGA siya sa kanila at nagsabi: Tanggapin ninyo ang Espiritu Santo."

Ang pagtanggap na ito ng Espiritu Santo ng mga Apostol ay ipinasa nila sa mga taong humalili o pumalit sa kanila. At ito na nga ang mga pari na TUMANGGAP DIN ng Espiritu Santo.

Sa pamamagitan ng Espiritu Santo na ito ay NAGBABASBAS ang mga pari.

Magandang malaman na WALANG IBANG PUNO ng anumang grupong panrelihiyon ang BINIGYAN at TUMANGGAP ng Espiritu Santo liban sa mga Apostol, obispo at pari.

At dahil sa kapangyarihan na bigay ng Espiritu Santo ay nagbebendisyon ang mga pari ng mga bagay tulad ng Iscapularyo para maging daluyan ng biyaya at pagpapala.

Pero tulad ng iba pang bagay na panrelihiyon, WALANG BISA ang SCAPULAR kung WALANG PANANAMPALATAYA sa Diyos ang nagsusuot nito.

Basahin natin itong sinasabi sa Matthew 9:20-22, "Sa pagkakataong iyon, isang babae na may pagdurugo sa loob ng labing dalawang taon ang lumapit sa likod niya at hinipo ang laylayan ng kanyang balabal."

"Sinabi niya sa kanyang sarili: Mahawakan ko lang ang kanyang balabal ay gagaling na ako."

"Lumingon si Hesus at nakita siya. ‘Magalak ka, anak,’ sabi niya, ‘PINAGALING KA NG IYONG PANANAMPALATAYA.’ At ang babae ay GUMALING mula sa sandaling iyon."

Ganoon din ‘yon sa SCAPULAR, AM. Isa ito sa mga bagay na nagpapakita ng PANANAMPALATAYA ng isang tao sa Diyos.

Kahit hindi ka magsuot ng Scapular ay mananatili ang pagmamahal ng Diyos sa iyo.

Pero NAKAKATULONG ito dahil mayroong bagay na palaging NAGPAPAALALA sa iyo ng mga dapat mong gawin bilang Kristiyano.

Ibig sabihin, kahit magsuot ng scapular ang isang tao kung hindi naman siya nananampalataya o sumusunod sa utos ng Diyos at Iglesia ay bale wala rin ito.

‘Huwag hihigit sa mga nangasusulat’

August 28, 2003


MAY mga nagti-text at iginigiit na ipaliwanag ko raw ang kahulugan ng 1 Corinthians 4:6.

Isa ito sa mga talata na ginagamit ng mga BAGONG LITAW na mangangaral para sabihin na Bibliya lang ang dapat na BATAYAN ng PANANAMPALATAYA.

Totoo ba ito? Para sa katahimikan ng loob ng lahat ay ipaliliwanag po natin ang sinasabi ng 1 Cor 4:6.

Basahin muna natin ang sinasabi ng talata.

Eto ‘yon, "Ngayon, mga kapatid, inilapat ko ang mga bagay na ito sa akin at kay Apollos para sa inyong kapakinabangan. Ito ay para matutunan ninyo mula sa amin na HUWAG MAGSIHIGIT SA MGA NANGASUSULAT. Sa ganoon ay hindi ninyo ipagmalaki ang isang tao laban sa iba pa."

Makikita natin sa 1 Cor 1:10-13 na pinupuna ni Pablo ang pagkakahati-hati at pag-aaway-away ng mga taga-Corinto.

Ayon nga sa verse 12, "May isa na nagsasabi na: Sinusunod ko si Pablo; ang isa pa: Sinusunod ko si Apollos; ang isa pa: Sinusunod ko si Cephas; at may isa pa: Sinusunod ko si Kristo."

Ito ay dahil sa PAGMAMAGALING ng ilang mangangaral na "pantas" daw na magaling makidebate (verse 20).

In short, may iba’t-ibang pahayag tungkol kay Kristo. Nagkakampi-kampi tuloy ang mga tao.
Dahil diyan ay sinabi ni Pablo ang nasasaad sa 1 Cor 4:6.

Pero ano nga ba itong tinutukoy na "nangasusulat" na hindi dapat higitan?

Ito ang mga PAHAYAG ng Banal na Kasulatan TUNGKOL kay KRISTO. HINDI RITO TINUTUKOY ang LAHAT ng bagay sa PANANAMPALATAYA.

Paano natin ito nalaman? Heto po.

u u u

Sino ba si Hesus at ano ba ang pakilala sa Kanya, partikular noong panahon na iyon?

Si Hesus ANG KATUPARAN ng mga HULA at PAHAYAG sa KASULATAN. Siya ang DARATING na TAGAPAGLIGTAS ayon sa Kasulatan.

Sabi mismo ni Hesus sa John 5:39, "Maigi ninyong pinag-aaralan ang mga KASULATAN dahil iniisip ninyo na sa pamamagitan nila ay mayroon kayong buhay na walang hanggan."

"Ito ang mga KASULATAN na NAGPAPATOTOO SA AKIN."

Ayon sa Romans 1:2, Si Hesus ang KATUPARAN ng "EBANGHELYO [ng Diyos] na ipinangako niya mula noon pa sa pamamagitan ng mga propeta sa BANAL na KASULATAN."

At isa sa mga pahayag ng Kasulatan, ayon kay Pablo, ay NAMATAY si Kristo para sa ating lahat.
Sabi nga niya sa 1 Cor 15:3, "Dahil kung ano ang tinanggap ko ay ibinibigay ko sa inyo una sa lahat: Na NAMATAY si Kristo para sa ating mga kasalanan SANGAYON sa mga KASULATAN."

Dito ay ipinakikita ni Pablo na ang pagkakapako kay Hesus sa krus ay NAAAYON sa HULA o PAHAYAG ng Kasulatan.

Kinailangang igiit ni Pablo ang sinasabi ng KASULATAN tungkol kay Hesus dahil may mga mangangaral na LUMILIHIS sa HULA.

Halimbawa, mayroon noong mga mangangaral na nagsasabi na DIYOS LANG si Kristo dahil sa mga MILAGRO Niya tulad ng PAGBUHAY ng PATAY at iba pa.

Umabot sila sa paniniwala na HINDI NAMATAY sa Krus si Kristo. May paniniwala nga noon na ang ipinako sa krus ay si Hudas.

Para kasi sa mga mangangaral na ‘yon, partikular sa mga galing sa Hudaismo, KATITISURAN ang pahayag na IPINAKO sa krus si Kristo.

Sa mga Kristiyano naman na dating Hentil, KALOKOHAN kung namatay si Kristo sa krus.

Kaya nga sinabi ni Pablo sa 1 Cor 1:23, "Ang ipinangangaral namin ay isang KRISTO NA IPINAKO SA KRUS: isang KATITISURAN sa mga Hudyo at KAGAGUHAN sa mga Hentil."

Ang ibang sinasabi tungkol kay Kristo ang tinutukoy sa 1 Cor 3:10-13, "Sa biyaya ng Diyos na ibinigay sa akin, naglatag AKO ng pundasyon bilang bihasang manggagawa, at may iba naman na nagtayo rito."

"Pero ang bawat isa ay dapat na maingat sa pagtatayo dahil wala nang ibang puwedeng maglatag ng anumang pundasyon liban sa nailatag na, si Hesu Kristo."

"Kung mayroong magtatayo sa pundasyon gamit ang ginto, pilak, mamahaling bato, kahoy o dayami, ang kanyang gawa ay malalantad kung ano ang mga ito. Darating ang Araw at malalagay ito sa liwanag. Ito ay mabubunyag sa pamamagitan ng apoy."

Sa gitna ng iba’t-ibang sinasabi ng ibang mangangaral, sinabi ni Pablo sa 1 Cor 4:2-5 na "huwag munang huhusga" bago dumating ang takdang panahon.

Pansamantala, habang hindi dumarating ang araw ng paghuhukom, sinasabi ni Pablo na ang PAGBATAYAN na lang ay ang nasusulat TUNGKOL kay Kristo (1 Cor 4:6).

In short, para kay Pablo, ang KASULATAN ang BATAYAN sa PAGKILALA kay KRISTO. At ang NASUSULAT LANG tungkol sa KANYA ang sinasabi na "hindi dapat higitan."

Kaya hindi puwedeng gamitin ang talata para sabihin na Kasulatan ang dapat batayan ng LAHAT ng bagay sa PANANAMPALATAYA. MALI kung ganoon ang magiging pagkakaunawa

Bakit dapat umiwas sa mga palamura?

August 27, 2003


NAGKAROON kami ng palitan ng paliwanag ni AJ Reyes ng Cavite at napag-usapan namin ang tungkol sa pagsasabi ni Eliseo Soriano ng "gago," "ulol" at iba pang salita na masakit sa tenga.

Nag-react si AJ dahil palagi kong sinasabi na may mga "mangangaral" na PALAMURA.

Ang pakiramdam ko ay nasaktan si AJ dahil parang natutumbok ang mangangaral niyang si Soriano.

Naitanong tuloy ni AJ kung "Mura ba ang ‘gago?’" Liban pa roon, parang hindi rin niya matanggap na mura ang "ulol."

Hinamon niya ako na patunayan na "mura" ang "gago" at ang "ulol." Parang hindi talaga siya makapaniwala na MASAMA ang pagsasabi ng "GAGO" at "ULOL."

At para patunayan na mali ako, inutusan ako nitong tagasunod ni Soriano na "tumingin" ako sa dictionary at tingnan ko kung "mura" ang "gago" at "ulol."

Sa mga ordinaryong tao at Pilipino ay HINDI na KAILANGANG ipaliwanag na ang pagsasabi ng "gago" at "ulol" sa isa pang tao ay "pagmumura."

Pero dahil may mga tao na tulad ni Soriano at ni AJ na naniniwala na hindi ito pagmumura ay tutulungan nating maibsan ang ganitong PAGKABULAG.

u u u

Sagutin nga natin itong tanong ni AJ kung "mura" o isang uri ng pagmumura ang pagsasabi ng "gago," "ulol" at iba pang salitang paboritong bigkasin ng ilang mangangaral na KAILAN LANG LUMITAW.

Una sa lahat, ano ba itong "mura" o pagmumura?

Ang gamitin natin ay ang mismong definition na ibinigay sa akin ni AJ (na malamang ay kinuha rin niya sa grupo ni Soriano).

Sabi ni AJ, "Ang mura ay pinabababa mo ang kalagayan ng tao sa natural niyang katayuan."

Naiintindihan naman po siguro natin ang sabi ni AJ.

Pag PINABABA raw ang KALAGAYAN ng isang tao sa natural nitong katayuan ay "pagmumura" ito.

Ngayon, tingnan naman natin ang kahulugan ng "gago."

Ayon mismo kay AJ, ang "gago" ay "taong mahina ang utak."

Kung ganoon, ano ang ginagawa ng isang tao kung tatawagin niyang "gago" ang isa pang tao?

Una ay HUHUSGAHAN niya ang kapwa niya at sasabihin pa "mahina ang ulo."

Malamang ay HINDI siya TIYAK na "mahina nga ang ulo" ng sinasabihan niya ng "gago." Kaya malamang ay HINDI TOTOO na "mahina ang ulo" ng kanyang sinasabihan.

Ngayon, hindi ba PINABABABA niya ang NATURAL na KATAYUAN ng kanyang sinasabihan?

Kung ganoon, PAGMUMURA ang pagsasabi niya ng "GAGO."

Siguro naman ay maliwanag ‘yon. At maliwanag na mura rin ang "ulol" kapag ginamit nang ganoon.

Ang pagmumura ay lalong nagiging hayag o tuwiran kung ito ay ginagawa ng isang taong GALIT o kapag sinasabi lang ito dahil KAAWAY niya o KATUNGGALI ang sinasabihan.

Sa madaling salita, kaya siya tumatawag ng "gago" at "ulol" sa ibang tao ay hindi dahil may sapat siyang dahilan o batayan pero dahil lamang GALIT siya rito o ASAR dahil hindi ito sumasangayon sa kanya.

Pero paano kung sa tingin ng isang tao ay hindi masama o "mura" ang "gago" o "ulol?" Puwede na ba siyang tawaging "gago" o "ulol?"

Marahil ay puwede kung para lang MATAUHAN siya na MASAKIT at MASAMA ang pakiramdam ng tinatawag ng ganoong mga salita.

Ito ay sa hangad na GISINGIN siya at ITUWID ang kanyang pagkakamali.

Pero kung sakaling sa kabila ng alam na niyang MASAKIT, MASAMA at PAGMUMURA ang mga salitang "gago" at "ulol" ay igigiit pa niya na HINDI ITO "MURA," parang umamin na siya na "gago" nga siya.

Ipagdasal na lang natin ang taong ganito.

u u u

Ngayon, ang punto natin dito ay HINDI DAPAT MAGMURA ang isang tao.

Bakit? Ang pagmumura kasi o pagtawag ng "gago" o "ulol" o "tanga" sa ibang tao ay MALING PAGHUSGA at LABAG sa sinasabi ng Matthew 7:1.

Ang sabi ni Kristo sa talata ay "HUWAG kang HUHUSGA o ikaw man ay HUHUSGAHAN."

Sabi ko nga noon pa, hindi ipinagbabawal ang lahat ng uri ng paghusga. Pero sinasabi ko nga na iwasan natin ito dahil baka masanay tayo sa MALING PAGHUSGA.

Ano ba ang silbi ng salitang "gago," "ulol," at "tanga" kundi ang paghusga sa ating kapwa. Buti kung tama ang paghusga. Pero paano kung mali? Ito ay nagiging WALANG SAYSAY na SALITA.

‘Yan ang nakakatakot.

Bakit? Basahin natin ang sinasabi ng Matthew 12:35-37, "Ang mabuting tao ay nagdadala ng mabubuting bagay mula sa kabutihan niyang itinatago. At ang MASAMANG TAO ay nagdadala ng MASASAMANG bagay mula sa KASAMAAN na kanyang itinatago."

"Sinasabi ko sa inyo na ang mga tao ay kakailanganing MAGSULIT sa araw ng paghuhukom para sa BAWAT WALANG SAYSAY na salita na kanilang sinabi."

"Sa pamagitan ng inyong salita kayo ay pawawalang sala at sa pamamagitan ng inyong salita kayo ay KOKONDENAHIN."

Kaya ang pakiusap ko lang po ay HUWAG na tayong TUMULAD sa MASAMANG EHEMPLO ng ilang mangangaral sa ngayon. Ipapahamak lang nila kayo.

Kanino ang Bibliya at sino ang may ‘K’ dito?

August 26, 2003


NAGPOPROTESTA si Christian Dy ng QC. Ganito ang sabi niya, "Mr. Cenon Bibe, h’wag ka nang sumipi ng talata sa Bibliya dahil ‘di mo naman unawa. At sino ka para mangaral?"

Nauunawaan ko ang sinasabi mo, Christian. Tiyak marami akong sinasabi na hindi mo matanggap.

Ngayon, imbes na magprotesta ka bakit hindi mo sabihin kung ano sa palagay mo ang tamang interpretasyon o unawa sa mga talatang sinasabi ko?

At dahil nabanggit mo na ang tungkol sa pag-unawa sa Banal na Kasulatan, naitanong mo na ba sa sarili mo kung SINO ang MAY KARAPATANG UMUNAWA sa BIBLIYA?

Hindi naman siguro lingid sa inyo na napakaraming tao ang gumagamit at dumadampot ng talata sa Bibliya.

Akala ng mga gumagamit na ito sa Bibliya ay KANILA ang Banal na Kasulatan.

Pero KANINO ba ANG BIBLIYA, partikular ang NEW TESTAMENT?

SINO ang MAY KARAPATAN at NASA LUGAR para UMUNAWA sa mga nakasulat dito?

u u u

Ang Banal na Kasulatan, partikular ang New Testament, ay PAG-AARI ng Iglesiang ITINATAG ni Kristo noon pang UNANG SIGLO.

Paano natin ito nasabi?

Sa simpleng pagtingin sa mga aklat at sulat sa Bibliya ay makikita natin na ang mga ito ay GINAWA para sa Iglesia na nasa iba’t-ibang lugar.

Halimbawa, sabi sa Romans 1:8, "Una sa lahat, nagpapasalamat ako sa aking Diyos sa pamamagitan ni Hesu Kristo para sa INYONG LAHAT, dahil ang inyong pananampalataya ay ipihapahayag sa buong mundo."

Ang "inyong lahat" ay tumutukoy sa mga miyembro ng Iglesia na nasa Roma. Ibig sabihin, ang sulat sa mga taga-Roma ay sa IGLESIA.

Ganito naman ang sabi sa 1 Corinthians 1:1-2, "Si Pablo, tinawag para maging apostol ni Kristo Hesus sa kalooban ng Diyos, at si Sosthenes ang ating kapatid, SA IGLESIA NG DIYOS na NASA CORINTH ... at sa nasa LAHAT ng dako na tumatawag sa ngalan ng ating Panginoong Hesu Kristo bilang Panginoon."

Ang ganitong pagbati ay nauulit sa iba pang aklat at sulat sa Banal na Kasulatan. Patunay lang na MAYROONG NAGMA-MAY-ARI ng mga ito. At ITO NGA ang IGLESIANG ITINATAG NOON PANG UNANG SIGLO.

Ang tanong ngayon ay ALIN sa mga grupo NGAYON ang IGLESIANG ITINATAG ni Kristo?
Simple lang. Ito ang Iglesia na matutukoy pabalik kay Kristo, sa mga Apostol. At ‘yan ay wala nang iba kundi ang IGLESIA KATOLIKA.

Ibig sabihin, ang Bibliya at ang Banal na Kasulatan, partikular ang New Testament ay PAGMA-MAY-ARI ng IGLESIA KATOLIKA, ang IGLESIANG ITINATAG NI KRISTO.

u u u

May pruweba ba tayong maipapakita na ang mga Kasulatan ay pag-aari ng Iglesia Katolika?
Isa-isahin natin.

Una, IISA ang ITINATAG o ITINAYO na Iglesia ng Panginoong Hesus. ‘Yan ay ayon sa Matthew 16:18.

Sinabi ni Hesus sa talata, "At sinasabi ko sa iyo, ikaw ay Pedro, at sa ibabaw ng batong ito ay itatatag ko ang AKING IGLESIA."

Hindi sinabi ng Panginoon na "mga iglesia."

Pangalawa, tulad ng nabanggit ko na, ang mga sulat at aklat ay ipinadala at ipinatungkol sa iba’t-ibang bahagi ng Iglesia na nasa ibang lugar.

Pero kahit pa marami at hiwa-hiwalay ang mga bahagi ng Iglesia na ito, ang mga ito ay IISA kay Kristo.

Sabi nga sa Romans 12:5, "Kay Kristo, tayo na MARAMI ay BUMUBUO ng ISANG KATAWAN, at ang bawat isang miyembro ay bahagi ng bawat isa pa."

Dahil diyan ay nagawa ng Iglesia na nasa iba’t-ibang lugar na ibigay rin at ipasa sa ibang miyembro ang mga sulat o aklat na kanilang natanggap.

Pagdating ng bandang 390 A.D. ay nagkaroon ng kontrobersiya kung alin-alin sa mga kasulatan na nagkalat noon ang galing sa Diyos o "INSPIRED."

Noon kasi ay MARAMI nang iba’t-ibang kasulatan na nagkalat. Liban sa mga Kasulatan na kasama na ngayon sa New Testament ay may 300 iba pang sulat na NAGKUNWARI noon na "inspired."

Kaya noong 393 A.D. sa Council of Hippo at 398 A.D. sa Council of Carthage ay IGINIIT ng Iglesia Katolika ang pagma-may-ari nito sa mga Kasulatan.

Sa dalawang konsilyo na ito ng IGLESIA KATOLIKA ay KINILALA ng Kawan ni Kristo ang mga Kasulatan na KANILA at HINDI KANILA.

Dito nga ay PORMAL na idineklara na BANAL at GALING sa Diyos ang 46 aklat sa Old Testament at 27 aklat sa New Testament.

Kung hindi pag-aari ng Iglesia Katolika ang mga Kasulatan, partikular ang nasa New Testament, ano ang karapatan nitong ideklara na "inspired" o "hindi inspired" ang mga ito?

Sa katunayan, ang deklarasyon ng Iglesia Katolika sa New Testament ay TANGGAP ng mga Protestante at iba pang grupo.

Ngayon, ang nangyayari ay NAKIKIBASA at NANGHIHIRAM na lang ng Kasulatan ang mga BAGONG SULPOT na mangangaral ay NAGMAMAGALING pa sila.

Kaya babalik tayo sa tanong kung SINO ang may KARAPATANG MAG-INTERPRET ng Bibliya. Kaninong pagkakaunawa rin ang TAMA?

Hindi ba ang may karapatan ay ang MAY-ARI na siya ngang IGLESIA KATOLIKA?

Kaya ito lang ang masasabi ko kay Christian: Ako ay miyembro ng Iglesiang MAY-ARI ng mga Kasulatan kaya may KARAPATAN akong magsalita tungkol dito.

Ikaw, Christian, Katoliko ka rin ba? At masasabi mo bang may "K" ka rin?

Bakit may kaguluhan at may binyag sa bata?

August 25, 2003


MAY dalawang magkaugnay na tanong na sasagutin ko ngayon. Ang una ay sa isang kaibigan na nagtanong kung "Kung may Diyos, bakit hinahayaan Niya na magkaroon ng kaguluhan sa mundo?"

Ang isa pang tanong ay mula kay Hilbert, "Bakit po ba kailangang binyagan ang mga bata e wala pa naman po silang kasalanan?"

Siguro ay nagulat ang iba sa inyo dahil sabi ko ay MAGKAUGNAY ang dalawang tanong na ito.
MAGKAUGNAY sila dahil PAREHO ang UGAT kung bakit may kaguluhan sa mundo at kung bakit binibinyagan ang isang bata.

Ang UGAT ay ORIGINAL SIN. Pero ano ang kaugnayan nito sa KAGULUHAN at BINYAG sa BATA?

u u u

Una dapat nating malaman na ang Diyos ay DIYOS ng KAAYUSAN.

Mababasa natin sa aklat ng Genesis na magmula noong likhain ng Diyos ang sanlibutan ay inilagay Niya ang lahat ng bagay sa mga dapat nilang lugar o pagkalagyan. (Genesis 1)

Sa katunayan, ang buong Bibliya ay tungkol sa KAAYUSAN na inilagay ng Diyos sa ating personal na buhay, sa ating pamilya at sa ating buhay panlipunan.

Halimbawa sa Matthew 22:37-39 ay sinabi ng Panginoon ang KAAYUSAN sa buhay at relihiyon.

Sabi ng mga talata, "Mahalin mo ang Panginoon mong Diyos ng iyong buong puso, kaluluwa at pag-iisip … At mahalin mo ang iyong kapwa tulad ng iyong sarili.”

Sa Mt 6:33 ay makikita natin ang epekto kung SUSUNDIN natin ang KAAYUSAN ng Diyos.
Sabi rito, “Una mong hanapin ang kaharian ng Diyos at ang Kanyang katuwiran at ang LAHAT ng ITO [kasaganaan, kaligayahan, kaligtasan etc.] ay IDADAGDAG sa iyo.”

Kung may tao na LILIHIS sa kaayusang itinakda ng Diyos, ito ay GAGAWA ng KASALANAN.

Ang KASALANAN kasi ay galing sa salitang SALA na ang isang kahulugan ay LIHIS. Kaya nga ang ibig sabihin ng KASALANAN ay PAGLIHIS sa KAAYUSAN na ITINATAG ng Diyos.

Ayon sa Roma 6:23, “Ang KABAYARAN ng kasalanan ay KAMATAYAN.” Kaya nga ang tao ay NAMAMATAY. Ito ay dahil sa KASALANAN.

Liban pa riyan, ang kasalanan ay nagreresulta sa KAGULUHAN, KALITUHAN at PAGHIHIRAP.

Kung titingnan natin ang ehemplo sa ating panahon, makikita natin na dahil lumilihis ang mga nasa gobyerno sa KAAYUSAN na sila ay TAGAPAGLINGKOD sa mga tao, ang nangyayari ay may mga"public servants" na NAGNANAKAW sa bayan at ang iba naman ay UMAABUSO.

Ang epekto ay MAGULO ang ating lipunan at marami ang NAGHIHIRAP.

Bakit nagkaganoon? Dito papasok ang ORIGINAL SIN.

u u u

Nakita na natin na HINDI DIYOS ang may bigay ng kaguluhan. Kaya mayroon nito ay dahil nasira ang kaayusang inilagay ng Diyos sa Kanyang mga nilikha.

Ayon sa Bibliya, ang pagkasira ng kaayusang ito ay unang nangyari noong hangarin ni Eba at Adan na maging “tulad ng Diyos” sa kabila ng sila’y mga nilikha lamang. (mababasa ito sa Genesis chapter 3)

Mga TAO LANG sila pero GINUSTO nilang maging “diyos.” ITO ang tinatawag na “Original Sin.”
Kung papansinin natin, kahit naman ngayon ay maraming tao ang gustong maging “diyos.”

Tingnan ninyo itong ilang BAGONG LITAW na mangangaral (daw) na nagkukunwaring "pantas" at NAGKUKUNWARI na ALAM ang LAHAT. MALI-MALI naman ang mga sinasabi.

May grupo, tulad nitong Ang Dating Daan ni Eli Soriano, ang nagkakalat ng maling aral tungkol sa itinuturo ng Simbahan Katoliko kaugnay ng “Original Sin.”

Ayon kay Soriano, ang itinuturo raw ng Katolisismo ay “NAMANA ng mga tao ang KASALANAN nina Eba at Adan.”

Hindi ito ang ibig sabihin ng “Original Sin” ayon sa Iglesia Katolika. Nag-IMBENTO lang ng aral si Soriano at IBININTANG ito sa mga Katoliko. Tama ba ‘yon?

Sa doktrina ng “Original Sin,” hindi ang mismong kasalanan nina Eba at Adan ang namamana ng tao kundi ang EPEKTO ng kanilang maling ginawa.

Para maintindihan natin ito, basahin natin ang Genesis 3:16-19. Dito ay nadiskubre ng Panginoon ang ginawang pagsuway nina Eba at Adan sa Kanyang utos. Dahil dito ay pinarusahan Niya ang mga ito.

Sa 16: “Sa babae sinabi Niya: Patitindihin ko ang hirap ng iyong panganganak; mapupuno ng sakit ang pagluluwal mo ng iyong mga anak. Sa kabila nito, mananabik ka sa iyong asawa at siya ang magigi mong panginoon.”

“Sa lalaki sinabi niya … ‘Sumpain ang lupa nang dahil sa iyo. Bubungkalin mo ito para makain ang kanyang bunga sa buong buhay mo. Uusbong dito ang mga tinik at kakain ka sa mga halaman sa parang."

Sa 19, “Kakain ka sa pamamagitan ng pawis na tumutulo sa iyong mukha hanggang sa bumalik ka sa lupa kung saan ka nagmula. Dahil ikaw ay lupa at sa lupa ka rin magbabalik.”

Ang lahat ng paghihirap na ito ang bunga ng “Original Sin.

At isa nga sa masamang bunga nito ay ang pagpasok ng KAMATAYAN.

Kaya nga sa Iglesia Katolika, ang pagbibinyag sa bata ay HINDI DAHIL may kasalanan ito.

Binibinyagan ang bata para mapartihan ito ng BUHAY na WALANG HANGGAN na bigay ni Hesus.

Sabi kasi sa Roma 6:4, "Tayo nga ay INILIBING kasama niya sa pamamagitan ng BINYAG sa kamatayan upang, tulad ni Kristo na binuhay mula sa patay sa pamamagitan ng kaluwalhatian ng Ama, TAYO MAN ay MABUHAY sa PANIBAGONG BUHAY."

Maria, Iniakyat sa Langit? Totoo?

August 24, 2003


LAST week, ipinakita ko kung paano naging BIBLICAL ang Santo Rosaryo na tinututulan ng maraming "Bible Christians."

Inisa-isa ko ang mga talata ng Bibliya na batayan ng iba’t-ibang mysteryo sa buhay ng Panginoong Hesus at ni Birheng Maria.

Nagpapasalamat ako dahil isa sa mga readers natin, si AJ ng Cavite, ang nakapuna na isa sa mga misteryo ay walang kasama na verse sa Bible.

Ito ang 4th Glorious Mystery o ang Assumption ni Maria sa Langit.

Sabi ni AJ, "Ano ang batayan ng 4th Glorious Mystery?"

Sa ibang salita, gustong malaman ni AJ kung may batayan sa Bibliya ang paniniwalang ito ng mga Katoliko.

Salamat sa tanong mo, AJ.

Una, ano ba muna ang "Assumption?"

Ito ang paniniwala ng mga Katoliko na sa dulo ng buhay ng ina ng Panginoong Hesus ay KINUHA ng Diyos ang kanyang KATAWAN at KALULUWA at DINALA ito sa Langit.

Mula pa ng UNANG PANAHON ay naniwala na ang mga Kristiyano rito pero pormal lang itong idineklara na isang aral ng Iglesia noong November 1, 1950.

Bakit noon lang 1950? Ito ay dahil hindi basta-basta nagdedeklara ng aral ang Iglesia Katolika kung hindi ito lubos na napapag-aralan at nasusuri kung tama o mali.

Sa kaso ng "Assumption," noon lamang 1870s may mga nakaisip na pormal na magpetisyon sa Iglesia para ideklara na itong opisyal na aral.

At matapos ang may 80 taon -- matapos ang masusi at malalim na pag-aaral -- ay saka pa lamang ito idineklara bilang aral.

u u u

Pero mayroon bang batayan ang paniniwala na KINUHA ng Diyos si Maria sa kanyang katawan at kaluluwa?

Sa mas simpleng tanong, may batayan ba sa Bibliya ang PAGKUHA ng Diyos sa isang tao?

MAYROON. Ang dalawang halimbawa rito ay sina Enoch at Elias na parehong KINUHA ng Panginoon sa KATAWAN at KALULUWA.

Si Enoch ay mababasa natin sa Genesis 5:18-24. Basahin natin ang maikli niyang kasaysayan sa Bibliya.

Ganito ang sinasabi ng mga talata, "Nang si Jared ay nabuhay na ng 162 taon, siya ay naging ama ni ENOCH.

"At matapos na siya ay maging ama ni ENOCH, si Jared ay nabuhay ng 800 taon at nagkaroon ng iba pang anak na lalaki at babae. Sa lahat-lahat, nabuhay si Jared ng 962 taon, matapos noon ay pumanaw siya."

"Noong si ENOCH ay nabuhay na ng 65 taon, siya ay naging ama ni Methuselah. At matapos siyang maging ama ni Methuselah, si ENOCH ay lumakad kasama ng Diyos sa loob ng 300 taon at nagkaroon ng ibang anak na lalaki at babae. Sa kabuohan ay nabuhay si ENOCH ng 365 taon."

"Lumakad si ENOCH kasama ng Diyos. Matapos nito ay WALA NA SIYA dahil KINUHA SIYA ng Diyos."

Sa kaso ni Elias, siya ay isang TAPAT na propeta ng Diyos. Mababasa natin ang pagkuha sa kanya ng Diyos sa 2 Kings 2:11.

Ayon sa talata, "Habang naglalakad sila [kasama ni Elias ang alagad niyang si Elisha] at nag-uusap, biglang lumitaw ang isang karuwahe ng apoy at mga kabayo ng apoy at pinaghiwalay silang dalawa."

"At si Elias ay UMAKYAT sa langit sa isang ipu-ipo."

MALINAW sa pahayag ng Bibliya na may mga taong UMAKYAT sa Langit o KINUHA ng Diyos sa kanilang KATAWAN at KALULUWA.

Sa kaso ni Maria, sinasabi ng tradisyon ng Iglesia Katolika na noong siya ay 73 anyos natapos ang buhay niya sa lupa.

Sinasabi na BASTA NA LANG HINDI NAKITA ang kanyang KATAWAN at pinaniwalaan na KINUHA na ng Diyos ang kanyang KATAWAN at KALULUWA.

Ito ang dahilan kung bakit WALANG EBIDENSIYA na siya ay namatay at inilibing.

Kung titingnan natin ay MAY TANDA ng pinaglibingan at may mga LABI o REMAINS ang halos lahat ng mga naunang bayani ng Kristiyanismo.

Ang libingan ni San Pedro ay nasa Vatican. Ang kay Pablo ay nasa Roma.

Ang mga bangkay o labi ng mga unang Kristiyano ay tinipon at iningatan ng mga kapatid.

Pero sa lahat ng ito, walang nababanggit na mga LABI ni Maria. Ito nga ay dahil HINDI na nila ito NAKITA matapos KUNIN ng Diyos.

u u u

Ang tanong ngayon ay "Ano ang silbi kung maniwala tayo na kinuha ng Diyos ang katawan at kaluluwa ni Maria?"

Mahalaga ito dahil ipinakikita nito na TOTOO ang PANGAKO ni Hesus sa John 11:25-26.

Sabi ni Hesus sa talata, "Ako ang muling pagkabuhay at ang buhay. Sino man na maniwala sa akin ay MABUBUHAY KAHIT pa siya MAMATAY."

"At sino mang nabubuhay at maniwala sa akin ay HINDING-HINDI MAMAMATAY."

Para sa mga Katoliko, kung si Maria ay KINUHA ng Diyos sa KATAWAN at KALULUWA, sila rin ay KUKUNIN ng Diyos.

Kung si Maria ay PATULOY na NABUBUHAY KASAMA ng Diyos, sila rin ay MABUBUHAY KAPILING ang Diyos sa Langit.

Rosaryo: Papuri lang kay Maria?

August 23, 2003

SAGUTIN natin ang tanong ni Albert ng Naga City. Ganito ang tanong niya, "Saan ho ba naimbento ang rosaryo? Bakit ho mas maraming dasal ang kay Maria kaysa Luwalhati?"

Napakaganda ng tanong mo, Albert. Para kumpleto ang sagot ay iti-trace natin ang pinagmulan ng Rosary.

Ang Rosaryo ay umusbong sa KAGUSTUHAN ng mga Katoliko noong 800 AD na MAKAPAGPURI sa Diyos sa pamamagitan ng DASAL at AWIT.

Buhay kasi sa puso ng maraming Katoliko noon ang sinasabi sa Isaiah 42:10, "UMAWIT kay Yahweh ng isang bagong awit, ang kanyang PAPURI mula sa dulo ng daigdig."

Noong panahon na iyon ay paboritong DASALIN ng mga tao ang SALMO o AWIT. Ang partikular na gumagawa nito ay ang mga nasa MONASTERYO sa Europa kung saan araw-araw INAWIT ang 150 SALMO mula sa Banal na Kasulatan.

Ang problema noon ay maraming tao ang HINDI MARUNONG MAGBASA. Hindi rin laganap ang kopya ng Banal na Kasulatan na napakamahal kung bibilhin ng ordinaryong tao.

Isa pa, mas abala ang mga tao noon sa pagtatrabaho sa bukid kaysa pagpunta sa monasteryo o simbahan para maki-awit.

So, ano ang ginawa ng mga Katoliko para makapagdasal at makapuri pa rin sila sa Diyos?

Ang ginawa nila ay NAGDASAL sila ng "Ama Namin" bilang KATUMBAS ng bawat SALMO na inaawit sa mga monasteryo.

Ang nangyari ay 150 na sunod-sunod na AMA NAMIN ang dinadasal ng mga Katoliko noon.

Kaya makikita ninyo na NOON pa man ay uso na ang PAULIT-ULIT na PANALANGIN at PAPURI sa Diyos.

Dumating ang panahon na NAGPUPURI na sila nang HIWALAY sa ginagawa sa mga monasteryo. INUULIT-ULIT lang nila ang 150 AMA NAMIN.

Pero kung ngayon ay gumagamit tayo ng Rosaryo, noon ay gumamit sila ng 150 maliliit na bato. Ang iba ay gumamit ng tali na may 150 buhol para matiyak na nakumpleto nila ang 150 AMA NAMIN. May ulat na ang ilan ay AVE MARIA, o HAIL MARY, ang DANASAL.

u u u

Sa sumunod na 500 taon ay naging popular ang ganitong pamamaraan ng PAGDARASAL at PAPURI sa Diyos.

Noong 13th century, sinimulan itong gamitin sa loob na mismo ng Iglesia. Pero nilagyan ng konting pagbabago ng mga pinuno ng Iglesia.

PINAGSAMA nila ang PAGDARASAL gamit ang mga SALMO at ang paulit-ulit na dasal.

Imbes na paulit-ulit na AMA NAMIN, ay nagtalaga sila ng isang SALMO para sa isang BAHAGI ng buhay ni Hesus.

Ito ay ginawa para na rin paalalahanan at maturuan ang mga tao ukol sa BUHAY at GINAWA ng Panginoong Hesus na Siyang MABUTING BALITA.

Sabi nga sa 2 Timothy 2:8,"ALALAHANIN si Hesu Kristo, binuhay mula sa patay, nagmula kay David. Ito ang aking EBANGHELYO."

Hindi nagtagal ay na-develop ang Rosaryo na gamit ang iba’t-ibang misteryo sa buhay ni Hesus.

Noong naging popular ang debosyon sa ina ni Hesus na si Birheng Maria, ay ginamit ang HAIL MARY nang paulit-ulit. At naging tulad na nga ito ng Rosaryo na gamit natin ngayon.

u u u

Dito ay papasok ang sagot natin sa pangalawang tanong ni Albert. "Bakit ho mas maraming dasal ang kay Maria kaysa Luwalhati?

Sa isang tingin ay MAS MARAMING dasal ang para kay Maria sa loob ng Rosaryo. Pero kung susuriin natin ay makikita natin ang dahilan para rito.

Sabi nga natin ang Rosaryo ay PAGNINILAY o MEDITATION sa buhay ni Hesus. Ito ay ginagawa habang inulit-ulit ang HAIL MARY.

Kumbaga, ang mga labi ng isang nagro-Rosaryo ay kay Maria pero ang puso at isip niya ay NAKATUTOK kay HESUS.

Sa pamamagitan ng 10 HAIL MARY ay nabibigyan ng PANTAY at SAPAT na panahon para sa pagme-meditate sa bawat misteryo sa buhay ng Panginoon.

Kung hirap tumutok kay Hesus ang isang nagro-Rosaryo, puwede siyang tumutok kay Maria.
Sino ba si Maria? Si Maria ang UNANG KRISTIYANO.

Bago pa man may TUMANGGAP kay Kristo ay TINANGGAP na Siya ni Maria. Ito ay nangyari noong sabihin niya sa Luke 1:38, "AKO ANG ALIPIN ng Panginoon. Maganap nawa sa akin ang iyong sinabi."

Dahil nga sa pag-OO ni Maria ay hindi lang niya tinanggap ang ESPIRITU ni Hesus kundi ang Kanyang BUONG PAGKADIYOS at PAGKATAO. Bagay na hangad ng bawat Kristiyano.

Ibinigay ni Maria ang BUONG BUHAY niya kay Hesus.

Ang tanong sa nagro-Rosaryo ay: Ano, kaya n’yo bang gawin ‘yon?

So, ang paulit-ulit na HAIL MARY ay hindi lang basta papuri kay Maria. Ito ay paulit-ulit na PAANYAYA para TUMULAD tayo sa kanyang PAGMAMAHAL at PAGSUNOD sa kalooban ng Diyos.

At kung magagawa nating tumulad kay Maria, ‘yon ay NAPAKABANGO NA ALAY at PAGLUWALHATI sa PANGINOON.

‘Yan ang inaayawan ng Demonyo sa Rosaryo kaya kinokontra niya ito at ayaw niyang magro-Rosaryo ang mga tao.

Monday, March 11, 2013

Nagkakamali, dapat ba itiwalag sa Iglesia?


UNAHIN natin ang puna ng reader natin na si Timoteo Pablo sa Iglesia Katolika.

Ganito ang sabi niya, "Sa ICAR (Iglesia Catolika Apostolika Romana) pumatay ka, mangalunya ka, magsalaula ka ay kapatid ka pa rin."

"Ano ang ginagawang hakbang ng ICAR sa mga kaanib na ganito? WALA! Di rin sya basta-basta tinitiwalag binibigyan pa siya ng pagkakataong magbago."

"Inaalam ba ng ICAR ang kalagayan ng mga kaanib? HINDI! Ganyan ang ICAR. Pabaya. Gusto ng autority ayaw ng responsiblidad."

Nararamdaman ko, "Timoteo Pablo," na malalim ang hinanakit mo sa Iglesia Katolika. Wala akong magagawa kung ganyan ang nararamdaman mo.

Pero maniwala ka sa hindi ako man ay nakapagsasabi na NAPAPABAYAAN ang maraming Katoliko.

Marahil ang KAIBAHAN natin, "Timoteo Pablo," ay hindi ako tumigil sa pagkakaroon lang ng sama ng loob.

KUMILOS ako at PATULOY na KUMIKILOS para matugunan ang sa tingin ko ay pagkukulang ng mga pari.

Tulad ng sabi mo, ang turing sa isang miyembro ng Iglesia Katolika ay "KAPATID."

Ang KAPATID ay HINDI UMIIWAN sa kanyang mga KAPATID. LALONG-LALO na kung ito ay NANGANGAILANGAN.

Maraming Katoliko ang NAILILIGAW ng mga BAGONG LITAW na mangangaral dahil KULANG sila sa KAALAMAN.

Kaya nga narito ako at ang column na ito para MAIPAALAM sa kanila ang KATOTOHANAN ukol sa pananampalatayang Katoliko at subukan silang ITUWID.

May ganitong sinasabi sa Matthew 18:15, "Kung ang kapatid mo ay nagkasala sa iyo, puntahan mo siya at ipakita ang kanyang pagkakamali na kayo lang dalawa. Kung makinig siya sa iyo, nakuha mo sa iyong panig ang iyong kapatid."

‘Yan din ang dahilan kung bakit kahit nagkakamali ang isang KAPATID ay HINDI ITO AGAD ITINITIWALAG.

Sa ibang grupo, basta nagkamali ay TIWALAG KA AGAD. Ibig sabihin, ang turing sa mga kasama ay MIYEMBRO LANG at HINDI KAPAMILYA.

Sa Iglesia Katolika, ang BAWAT MIYEMBRO ay KAPATID at KAPAMILYA.

MADALING MAGTIWALAG. Ang MAHIRAP ay ang TUMULONG sa KAPATID para ito ay makapagbago.

Kaya huwag mo sanang mamasamain kung HINDI basta-basta NAGTITIWALAG ang Iglesia Katolika.

Sana ay alisin mo rin sa isip mo na NAGPAPABAYA ang mga Katoliko.

Sa totoo lang, hindi lang ang mga obispo at pari ang bumubuo sa Iglesia Katolika. Ang bawat isang Katoliko ay RESPONSABLE para sa kanyang kapwa.

Ako, bilang isang Katoliko, ay TUMUTULONG. HINDI ako UMUURONG o LUMALAYAS sa SAMBAHAYAN ng Diyos.

Naniniwala ako na mas MAKABUBUTI kung TUTULUNGAN ang naliligaw kaysa ito ay ITATABOY.

At kung HINDI NA MAITUTUWID ang isang kapatid, hindi na siya kailangan pang ITIWALAG.

Ang pagmamatigas kasi niya at hindi pagsunod sa utos at aral ng Iglesia ay para na rin siyang TUMIWALAG.

Ang KAGANDAHAN na hindi siya pormal na itiniwalag ay MADALI SIYANG MAKABABALIK kung magsisi siya.

Para maintindihan natin ito ay alalahanin natin ang kuwento ng Talipandas na Anak o "Prodigal Son" na nasa Luke 15:11-24.

Sa kabila ng PAGTALIKOD ng anak ay AGAD siyang TINANGGAP uli ng kanyang Ama.

u u u

Lubos-lubusin na natin at bigyang daan ang isa pang text ni "Timoteo Pablo." Ito ay may kaugnayan sa sinabi ko na HINDI LAHAT ay NASUSULAT sa Bibliya.

Ginamit kong batayan ang sinabi sa John 21:25 na ganito ang nasusulat, "Marami pang ibang bagay na ginawa si Hesus. Kung ang bawat isa sa mga ito ay isusulat, sa palagay ko ay maging ang buong mundo ay walang lugar para sa mga aklat na masusulat."

Ganito ang text ni Timoteo Pablo sa talatang ito, "(Ang mga aklat na tinutukoy rito ay) mga aklat (ng Bible) na susulatin pa lang."

Ikinalulungkot ko, Timoteo Pablo, dahil MALI ang pagkakaalam mo at pagkaunawa sa sinasabi ng talata.

Unang-una, HINDI MAAARI na ang tinutukoy sa talata ay "ang mga aklat ng Bible na SUSULATIN PA LANG."

Nasabi ko ito dahil LIBAN sa aklat ng "Revelation" ay WALA NANG IBA PANG AKLAT ng Bibliya na NASULAT matapos ang aklat ni John.

Sa katunayan, halos sabay na nasulat ang John at Revelation sa pagitan ng 96 AD at 100 AD.

Kaya pasensiya ka na, Timoteo Pablo, kahit ano pa ang sabihin natin ay HINDI NATIN MAPAPATUNAYAN mula sa Bibliya na ang LAHAT ay NASULAT.

Pero huwag kang malungkot. Sinasabi ng Bibliya na ang ibang ARAL ay IBINIGAY bilang ORAL TRADITION. ‘Yan ang tinutukoy sa 2 Thessalonians 2:15.

Ganito ang MALINAW na SINASABI ng talata, "Kaya nga, mga kapatid, manindigan kayong matatag at panghawakan ninyo ang mga TRADISYON na ibinigay namin sa inyo, maging ito man ay sa SALITA o sa SULAT."

Ang KABUOHANG aral ni Kristo ay IBINIGAY sa SALITA (ORAL) at SULAT (WRITTEN) na TRADISYON.

Kung gusto mong malaman ang KABUOHANG ARAL ni Hesus ay hanapin mo ang Iglesia na naroon ang ORAL at WRITTEN TRADITIONS ng Panginoon at ng mga Apostol.
Salamat uli.

Anong iglesia ang tukoy sa Acts 20:28?


GANITO ang text ni Edwin C. ng Zamboanga City, "Mr. Cimon Bibe, manloloko ka. Gamit mo pa ang Bibliya. ‘Di mo naman alam ang nakasulat doon dahil wala kang Espiritu ng Diyos."

Salamat sa text mo, Edwin. Hindi ko lang alam kung bakit mo nasabi na manloloko ako.

Mas maganda sana kung nagbanggit ka ng talata o salita sa Bibliya na ginamit ko ng mali para maloko ang mga mambabasa.

Madali kasing magsalita nang WALA NAMANG EBIDENSIYA.

Mahalaga na kung mag-aakusa tayo ay MAGLABAS tayo ng KONKRETONG BATAYAN ng ating sinasabi para masagot ng pinagbibintangan.

Sa araw-araw na lumalabas ang column ko rito ay palagi akong gumagamit ng mga talata sa Bibliya. Paki turo mo kung alin doon ang mali.

Samantala, paano mo nasabi na "wala" sa akin ang Espiritu Santo?

Kanino ba ibinigay ang Espiritu Santo?

Ganito ang sabi ni Hesus sa John 14:16, "Hihingin ko sa Ama at bibigyan niya kayo ng isa pang Tagapayo na makakasama ninyo magpakailanman – ang Espiritu ng katotohanan."

Ang kausap ng Panginoon dito ay ang mga Apostol at iba pang KASAMA sa Kanyang KAWAN – ang Iglesia. (Although noon ay hindi pa pormal na natatatag ang Iglesia)

Natupad ang pagbibigay ng Diyos sa Espiritu Santo noong araw ng Pentecost na inilalarawan sa Acts 2:1-4.

Sa John 20:21-22 ay ibinigay ang Espiritu Santo sa mga Apostol na SINUGO ni Kristo. Ang Espiritung ito ay IBINIBIGAY lamang sa mga MIYEMBRO ng IGLESIANG ITINATAG ni Kristo sa pamamagitan ng mga kamay ng mga Apostol.

Ang Iglesiang itinatag ni Kristo ay ang Iglesia Katolika na mati-trace pabalik kay Hesus at sa mga Apostol.

Ngayon, bilang miyembro ng Iglesia Katolika ay masasabi ko na NATANGGAP ko at NASA AKIN ang Espiritu Santo.

Ano ngayon ang batayan mo, Edwin, na wala sa akin ang Espiritu ng Diyos?

u u u

Ganito ang tanong ni Mr. Cordoviz ng Makati City, "Bakit may nagdadasal pa kay Virgin Mary samantalang puwede naman tayong dumirekta kay Jesus Christ?"

Ang paglapit kay Virgin Mary at paghingi ng tulong sa kanya ay walang pinag-iba sa paglapit natin sa isang kaibigan o kapatid sa pananampalataya para humingi ng tulong sa pamamagitan ng panalangin.

Minsan ay nasasabi natin ang "Brod, tulungan mo naman akong magdasal" o kaya ay "Please pray for me."

Bakit ito ginagawa ng iba sa atin?

Ito ay dahil may PANGAKO ang Panginoon sa Matthew 18:19 na ganito ang sinasabi, "Muli, sinasabi ko sa inyo na kung may dalawa sa inyo sa daigdig na magkasundo sa anumang bagay, ito ay gagawin para sa inyo ng aking Ama sa langit."

Mahalaga kasi sa Kristiyanismo ang komunidad. Ika nga, walang Kristiyano ang puwedeng mabuhay mag-isa. Kailangan ng isang Kristiyano ang iba pang Kristiyano.

Oo, puwede tayong dumirekta sa Diyos at maririnig tayo ng Panginoon kahit tayo nag-iisa pero ipinakikita sa Mt 18:19 kung gaano kahalaga ang pakikiisa at pagkakaisa ng mga tagasunod ni Kristo.

Ngayon, kung puwede tayong lumapit kahit kanino ay puwede tayong lumapit kay Maria.

Pero HINDI ‘yan COMPULSORY. Hindi kasalanan kung ayaw nating lumapit kay Maria. Nasa atin ‘yon.

u u u

May tanong si ARC Pineda ng QC kaugnay sa pagpapakita ko na ang tinutukoy sa Roma 16:16 ay ang Iglesia Katolika.

Ganito ang tanong ni ARC, "Kung hindi ang Iglesia ni Cristo ang nasa ROMA 16:16, ano ang iglesia ang tinubos ni CRISTO sa GAWA 20:28 ng Lamsa version."

Bago ang lahat, sa opinyon ko ay HINDI KATIWA-TIWALA ang SALIN ni George M. Lamsa.

Unang-una, sinasabi ni Lamsa na GALING sa ORIHINAL na ARAMAICO ang kanyang salin sa NEW TESTAMENT. Doon pa lang ay MALI na kaagad.

Bakit? Ang ORIHINAL na mga teksto ng NEW TESTAMENT ay HINDI NASULAT sa ARAMAICO. Ang mga ORIHINAL na teksto ay NASULAT sa GRIEGO.

Nakita mo na kung gaano kalaking KAMALIAN ang sinasabi ni Lamsa?

Ngayon, ano ang iglesia na tinubos sa Acts 20:28?

Ang tinubos na iglesia rito ay ang Iglesia na ITINATAG ni Kristo sa Matthew 16:18 NOON PANG UNANG SIGLO.

ISA LANG naman kasi ang ITINATAG at ITINAYO na Iglesia at ayon sa ipinakita ko na ay ito ang IGLESIA KATOLIKA.

Ngayon, ganito ang sinasabi ng Acts 20:28 sangayon sa ORIHINAL na GRIEGO, "Bantayan ninyo ang inyong sarili at ang buong kawan kung saan ginawa kayong tagapangasiwa ng Espiritu Santo."

"Maging mga pastol kayo ng IGLESIA NG DIYOS na BINILI NIYA NG SARILI NIYANG DUGO."

Sa kanyang salin ay NAGKAMALI si Lamsa noong isalin niya ang talata dahil ang ginamit niya ay "iglesia ni Kristo."

Although si Kristo nga ang tinutukoy na bumili sa Iglesia gamit ang "sarili Niyang dugo" mahalaga na mapansin natin ang paggamit ng "iglesia ng Diyos" sa ORIHINAL na GRIEGO.

Sa paggamit kasi ng "iglesia ng Diyos" ay ipinapakita ang pagkilala ng Bibliya sa pagka-Diyos ni Kristo.

At kaugnay uli sa tanong ni ARC, ang Iglesia na tinutukoy rito ay ang Iglesia na kumikilala kay Kristo bilang DIYOS.

Sana ay maliwanag, ARC.

Kailan natatag ang Iglesia Katolika?

August 20, 2003

NAG-TEXT po si Jorge ng Negros Occidental at nag-react tungkol sa paliwanag ko tungkol sa Pasko.

Ganito po ang sabi ni Jorge, "After my research and analysis I therefore conclude and agree with you that there is a great possibility that Christ might have been born on 25 December."

May dagdag pa siya na ganito, "Also, I therefore conclude that Mr. (Eli) Soriano is always criticizing and judging without studying. I believe he is a ‘dangerous preacher.’"

Nagpapasalamat naman ako Jorge dahil dati ay lagi tayong MAGKASALUNGAT ng paniniwala. Ngayon, kahit papaano, ay may pinagkasunduan din tayo.

Pasensya ka na kung may parte ng text mo na hindi naisama rito. Paki-send na lang kung ano ‘yung naputol.

Salamat.

u u u

Ganito ang tanong ni Henry Moreno ng Parang, Maguindanao, "Ang mga Hudyo ba hindi Kristiyano? Anong paniniwala ang mayroon sila?"

Hindi Kristiyano ang mga Hudyo. Pero ‘yon nga ang "irony" ng buhay dahil sila talaga ang dahilan kung bakit nagkatawang tao ang Panginoong Hesus.

Kung babasahin natin ang mga ebanghelyo, lalo na ‘yung isinulat ni Matthew, makikita natin na si Hesus ang KATUPARAN ng hinihintay na MESIAS o TAGAPAGLIGTAS ng mga Hudyo.

Sabi nga sa Matthew 15:24, "Sumagot siya [Hesus]: Ipinadala ako para lang sa mga ligaw na tupa ng ISRAEL."

Pero ang nangyari nga ay ITINAKWIL ng mga Hudyo si Hesus. Imbes na kilalanin Siya at tanggapin bilang Mesias o Tagapagligtas ay ipinako nila Siya sa krus.

Ganito ang sabi sa Acts 4:11, "Siya ang ‘bato na itinakwil ninyong mga gumagawa pero naging panulukang bato."

Kaugnay nito, sinasabi ng Mt 21:43 ang naging epekto ng pagtatakwil ng mga Hudyo sa Panginoong Tagapagligtas.

Sabi ng Panginoong Hesus sa talata, "Kaya nga sinasabi ko sa inyo na ang kaharian ng Diyos ay KUKUNIN MULA SA INYO [mga Hudyo ang tinutukoy] at IBIBIGAY sa mga tao na gagawa ng bunga nito."

Ang PINAGBIGYAN ng Kaharian ng Diyos ay ang KRISTIYANO o ang tao na KUMILALA at TUMANGGAP kay Hesus bilang Diyos at Tagapagligtas.

At ‘yon ang MAGANDANG BALITA para sa mga Kristiyano.

u u u

Ganito naman ang tanong ni Boy ng Makati, "Ano ang ibig sabihin ng word na Trinity?"

Salamat sa tanong mo, Boy.

Ang "Trinity" ay tumutukoy sa IISANG DIYOS na mayroong TATLONG PERSONA: ang AMA, ANAK at ESPIRITU SANTO.

Isa ‘yan sa BASIC DOCTRINES ng Kristiyanismo.

Ganun lang ‘yun.

u u u

Sabi naman ni Raimer ng Makati, "Mr. Bibe, salamat at marami kang natutulungan sa kolum mong ito. Tanong ko lang, paano ba nabuo ang Iglesia Katolika? Sino, kailan at saan?"

Maganda ang tanong mo, Raimer.

Ang PAGTATATAG ng Iglesia Katolika ay unang inihayag ni Hesus sa Mt 16:18 nang sabihin ng Panginoong Hesus sa Apostol na si Pedro, "At sinasabi ko sa iyo, ikaw ay Pedro [Bato] at sa ibabaw ng batong ito ay itatayo ko ang aking Iglesia."

Ang pahayag ni Hesus ay ginawa Niya habang Siya at ang mga Apostol ay nasa lungsod ng Caesaria Philippi.

Sa Mt 28:19 ay sinabi ng Panginoon na "Kaya nga humayo kayo at gawing alagad ang LAHAT NG BANSA. Binyagan ninyo sila sa ngalan ng Ama, ng Anak at ng Espiritu Santo."

Dito ay ipinahahayag ni Kristo na ang pagbibinyag ay PARA SA LAHAT o "universal." Sa Griego, ang katumbas na salita ng "universal" ay "KATOLIKOS" o "CATHOLIC" sa Ingles.

Lubos na NABUO o NATATAG ang Iglesiang Katolika noong bumaba ang Espiritu Santo sa mga Apostol at iba pang tagasunod ni Kristo na sinasabi sa Acts 2:1-4.

Isa sa mga epekto ng pagbaba ng Espiritu Santo ay sinasabi ng verse 4: "Lahat sila [mga tagasunod ni Kristo] ay NAPUNO ng ESPIRITU SANTO at nagsimulang magsalita sa IBANG WIKA sa tulong ng Espiritu."

Tanda ‘yan na PARA SA LAHAT ang Ebanghelyo ni Kristo o "universal."

Ang pagbaba at PAGTATATAG ng Iglesia ay naganap sa HERUSALEM. At mula sa Herusalem ay kumalat ang Kristiyanismo sa ibang bansa.

Sa Bibliya ay binanggit na nang LETRA POR LETRA ang EKKLESIA KATHOLES sa GREEK TEXT ng ACTS 9:31.

Sabi riyan, "HE men oun ekklēsia kath'holēs tēs Ioudaias kai Galilaias kai Samareias eichen eirēnēn."

MALINAW na TINUKOY riyan ang "ekklēsia kath'holēs" o IGLESIA KATOLIKA.



Sa labas ng Bibliya, ang unang RECORD na ginamit ang salitang "Catholic" ay noong 110 A.D. Ito ay sa isang sulat ni St. Ignatius of Antioch kung saan ginamit niya ang salitang "CATHOLIC" para tawagin ang BUONG IGLESIA.

Pero bago pa ito, malaki ang posibilidad na panahon pa ni St. John the Evangelist bandang 96 AD ay ginamit na ang salitang "Catholic" o "Katholicos" sa salita. Si Ignatius ay ESTUDYANTE ni St. John.

Bago ito, ang iba’t-ibang iglesia ay tinatawag ayon sa lugar kung saan sila naroon. Halimbawa ay iglesia ni Kristo sa Corinto o Efeso.

Para tukuyin ang IISANG IGLESIA ni KRISTO na NASA LAHAT ng DAKO o "universal" ay ginamit ang katawagang "CATHOLIC."

Nakakatuwang isipin na sa Antioch natukoy ang unang record na ginamit ang salitang "CATHOLIC" para tukuyin ang BUONG IGLESIA.

Dito rin kasi sa Antioch UNANG TINAWAG na mga KRISTIYANO ang mga tagasunod ni Kristo. Basahin sa Acts 11:26.