Pari binabawalan bang mag-asawa?

Agosto 13, 2003

NAG-TEXT sa atin si Romatz ng Biñan, Laguna. Sabi niya, "Alam mo, Mr. Bibe, ako’y natatawa na lamang sa iyong mga paliwanag (paliwanag ba o palabo?). Sabagay hindi ‘yan nakakapagtaka."

Mayroon pang ibang kasama itong text ni Romatz pero ipagpaumanhin po ninyo na hindi na ito pumasok.

Hinahanapan po namin ng solusyon itong paputol-putol ng pasok ng text ninyo. In the meantime, puwede po kayo na ang magputol-putol ng inyong mensahe at paki-send nang hiwa-hiwalay.

Tungkol naman sa natanggap nating text ni Romatz, salamat sa komentaryo pero sana ay na-specify mo kung ano ‘yung "lumabo."

Sabagay, siguro ay kasama ‘yon sa naputol na mensahe. Kaya kung maaari ay paki-text na lang uli.

u u u

Ganito naman ang sabi ni Alembert Alonzo ng GMA, Cavite, "Maitanong ko lang tungkol sa mga rebulto. Bakit halos lahat na yata ng santo eh may rebulto, ‘di ko na nga kilala ‘yung iba?"

Duda ako kung LAHAT ng santo ay may rebulto pero ang alam ko ay marami talaga ang mayroon.

Pero hindi naman ang rebulto o ang imahen nila ang mahalaga. Ang MAHALAGA ay MAKILALA natin sila at MATULARAN ang kanilang GINAWA PARA SA PANGINOON.

Sila kasi ang PATUNAY na MAY GANTIMPALA sa PAGSUNOD, PAGMAMAHAL at PAG-AALAY ng BUHAY sa DIYOS.

Ang itinuturo ng mga BAGONG LITAW na mangangaral ay NAMAMATAY ang mga NANINIWALA at NANANAMPALATAYA kay Kristo.

Sa Iglesia Katolika HINDI NA MAMAMATAY ang NANINIWALA at NANANAMPALATAYA kay Hesus.

Ang mga santo ang patunay na sa IGLESIA KATOLIKA NAGKAKATOTOO ang pangako ng Panginoon sa John 11:25-26.

Ganito ang sabi ng talata, "Sinabi ni Hesus sa kanya: Ako ang muling pagkabuhay at buhay. Ang maniwala sa akin ay MABUBUHAY KAHIT PA siya MAMATAY. At sino man ang nabubuhay at naniwala sa akin ay HINDING-HINDI MAMAMATAY."

Sa dulo ng talata ay itinanong ni Hesus, "NANINIWALA ka ba rito?"

Ang sagot ng mga Katoliko ay "OO." At ang mga santo ang PATUNAY nito.

Naniwala sila at nanampalataya kay Hesus kaya patuloy silang NABUBUHAY.

Kaya pinapahintulutan ang mga rebulto at imahen ng mga santo ay para makita natin na kaya rin natin ang ginawa nila.

Ibig lang sabihin ay MAGAGAWA rin natin kung paano sila NAGLINGKOD at NAGMAHAL sa Diyos. At TULAD din nila ay HINDI na rin tayo MAMAMATAY.

Maraming BAGONG LITAW na mangangaral ang NAGBABALEWALA sa sabi ng Panginoon at itinuturo na kahit maniwala at sumampalataya ang isang tao sa Kanya ay MAMAMATAY pa rin ito.

Naniniwala ako na isang dahilan kung bakit ayaw nila ng mga rebulto at imahen ay dahil pakana ng DEMONYO na ALISIN ang LAHAT ng NAGPAPAALALA sa PAGTATAGUMPAY ng Diyos sa buhay ng mga tao, partikular sa mga santo.

u u u

Ganito naman ang sabi ni Jorge ng Negros Occidental, "Bakit pinagbabawalan ng Katoliko ang obispo, pari o madre sa pag-aasawa ? Ang pagbabawal daw sa pag-aasawa ay "doctrine of devils."

Alam mo, Jorge, HINDI PINAGBABAWALAN ng Iglesia Katolika ang obispo, pari at madre sa pag-aasawa. SILA ang PUMILI na HINDI SILA MAG-ASAWA.

Isa na naman ‘yan sa mga KASINUNGALINGAN ng mga KAAWAY ng IGLESIA na ITINATAG ni KRISTO.

Pero bago natin pag-usapan ‘yan ay tingnan muna natin ang batayan ng sinasabi nilang "doctrine of devils" na ‘yan. At ‘yan ay mababasa sa 1 Timothy 4:1 at 3.

Ganito ang sabi ng mga talata, "Malinaw na sinasabi ng Espiritu na sa mga huling panahon ay pababayaan ng ilan ang pananampalataya at susunod sa mga MAPANLINLANG na mga espiritu at mga aral ng demonyo"

"IPINAGBABAWAL nila sa mga tao ang pag-aasawa at inuutusan silang huwag kumain ng ilang pagkain na nilikha ng Diyos para tanggapin na may pagpapasalamat ng mga naniniwala at nakaaalam ng katotohanan."

Una, HINDI IPINAGBABAWAL sa Iglesia Katolika ang pag-aasawa.

Kahit na sino basta nasa tama nang edad at katayuan sa buhay ay PUWEDENG MAG-ASAWA.

IGINAGALANG din ng Iglesia ang desisyon ng bawat tao sa kung anong uri ng buhay ang kanyang gusto.

Sangayon ito sa 1 Corinthians 7:8-9 na ganito ang sabi, "Ngayon, sa mga WALANG ASAWA at sa mga biyuda, sinasabi ko: MABUTI para sa kanila na MANATILING WALANG ASAWA, tulad ko. Pero kung hindi nila mapigilan ang kanilang sarili, dapat silang mag-asawa dahil mas mabuti na sila ay mag-asawa kaysa mag-apoy sa kanilang damdamin."

MALINAW na sinasabi na MAS MABUTI ang HINDI MAG-ASAWA pero puwede rin namang mag-asawa.

Bakit daw MAS MABUTI ang HINDI PAG-AASAWA?

Ganito ang sabi sa 1 Cor 7:32-33, "Gusto kong mawalan kayo ng alalahanin. Ang isang lalaking WALANG ASAWA ay abala sa mga GAWAIN ng PANGINOON."

"Pero ang lalaking may asawa ay abala sa mga gawain ng mundo – kung paano pasisiyahin ang kanyang asawa – at ang kanyang mga interes ay hati."

Ganoon din ang sabi ng verse 34 para sa mga babae.

Sangayon sa sinasabi ng Bibliya ay PINIPILI ng mga nagpapari at nagmamadre ang HINDI MAG-ASAWA.

WALANG PILITAN diyan. Kung mayroon mang napilit lang, dapat ay UMALIS na sila ngayon pa lang.

Ang nangyayari lang ay mayroong ilan na NAKAKAGAWA ng pagkakamali at ito ang batayan ng iba para sabihin na dapat ay pag-asawahin na silang lahat.

Parang ‘yung mga tagasunod ni Eliseo Soriano na ilang Katoliko lang ang nagkasala pero NILALAHAT na nila ang mga Katoliko. Tama ba ‘yon?