Ama at Anak hiwalay pero ISA pa rin

AGOSTO 7, 2003


MAY mahalagang tanong si Alex Felipe ng Lipa, Batangas. Sabi niya, "Mang Cenon kasalanan ho bang sabihan ko ng ‘manloloko’ ‘yung ale na nagbenta sa asawa ko ng P12,000 na ‘good luck charm’ kasama ang ‘imahen?’"

Siguro, brod, mas maganda kung kakausapin mo ang iyong asawa para hindi siya maniwala sa mga "good luck charms."

Ang mga "lucky charms" kasi na tinatawag ay maaaring maituring na mga makabagong "diyus-diyosan" na ipinagbabawal sa Bibliya.

Bakit? Dahil inilalayo ng "lucky charm" ang pagtitiwala ng tao sa Diyos. Dito na siya nagtitiwala at ‘di niya namamalayan na ginagawang na niya itong "diyos."

May mga tao na hindi na makalabas ng bahay kung hindi nila dala ang kanilang "lucky charm" at hindi na sila makagawa ng anumang bagay kung hindi nila ito hawak. Para na nga nila itong "diyos."

Sinasabi sa Isaiah 42:17, "Pero ang mga nagtitiwala sa mga diyus-diyosan, at nagsasabi sa mga imahen, ‘kayo ang aming diyos.’ ay maitataboy na puno ng kahihiyan."

Ang lumalabas na "diyus-diyosan" at "imahen" diyan ay ang "lucky charm."

Diyan mo makikita ang kaibahan sa mga imahen at rebulto sa simbahan.

Ang imahen sa simbahan ay NAGPAPAALALA sa Diyos o sa mga taong NAGMAHAL at NAGLINGKOD sa Diyos. Nakatutulong ang mga IMAHEN na ito para MAPALAPIT tayo sa Diyos.
Samantala, ang mga "imahen" ng "lucky charm" ay NAGLALAYO ng isip ng tao sa DIYOS na Siyang dapat nating pagtiwalaan.

Sa DIYOS LANG dapat tayo MAGTITIWALA. Hindi lang ito tamang gawin, may KAKABIT pa itong PAGPAPALA. Sabi nga sa Psalm 40, "PINAGPALA ang tao na NAGTITIWALA sa PANGINOON."

Ngayon, kung ang "imahen" ng isang santo o ng Panginoon ang gagawing "lucky charm" ay MALI rin. LABAG ito sa TAMANG GAMIT sa imahen at DAPAT na ITIGIL.

Ang imahen o rebulto ay PAALALA at PANTULONG LANG sa pananampalataya. HINDI dapat nagtitiwala sa mga ito.

Alex, maaaring magkasala ka pa kung tatawaging mong "manloloko" ang nagbenta sa asawa mo ng "lucky charm."

Although maaaring "manloloko" nga siya at baka tama na husgahan mo siya, mas ipapayo ko sa iyo na UMIWAS ka sa PAGHUSGA. Baka kasi masanay tayo sa paghusga ay mauwi tayo sa paghusga ng mali.

Sabi ng Panginoon sa Matthew 7:1, "Huwag kang huhusga o ikaw man ay huhusgahan."

Hindi rito ipinagbabawal ang lahat ng uri ng paghusga. Ang utos ay laban sa MALING PAGHUSGA.

Kung mapagsasabihan mo ay payuhan mo bilang kapatid ang nagbenta ng "lucky charm" sa iyong asawa dahil maaaring marami pa siyang mailigaw na tao.

Kung hindi ito maaari ay ipagdasal mo na lang siya.

+ + +

Ganito ang tanong ni Cherry Pelaez ng Gensan City, "Mr. Bibe, gusto ko lang itanong: Ang Dios Ama at ang Dios Anak sa paniniwala mo ba ay iisa? Kasi ang paniniwala ko ay dalawa sila."

Actually, Cherry, kung ang pagbabatayan natin ay ang paniniwala ng mga Katoliko ay TAMA ka: DALAWA at HIWALAY ang Diyos Ama at ang Diyos Anak. Sila rin ay HIWALAY at IBA sa Diyos Espiritu Santo.

Pero at the same time, Silang tatlo ay IISA.

Tingnan muna natin ang kanilang pagiging "iba-iba" at "hiwalay" sa isa’t-isa.

Mas madali natin itong maintindihan kung tingnan natin sila bilang "INDIVIDUALS."

Bilang "individuals," pare-pareho Sila ng NATURE ng pagka-Diyos. Pantay-pantay sila. Walang mataas. Walang mababa.

Sa katunayan, IISA ang Kanilang PANGALAN. Sabi sa Matthew 28:19, "Kaya nga humayo kayo at gawing alagad ang lahat ng bansa. Binyagan ninyo sila sa NGALAN ng Ama, ng Anak at ng Espiritu Santo."

Ang pagkakaroon ng iisang pangalan ay pagpapakita na hindi lang Sila ISA, Sila rin ay PATAS o MAGKAKAPANTAY.

Ang pagkaka-iba Nila ay IBA-IBA ang Kanilang mga PAPEL o ROLE na ginampanan sa tinatawag na "salvation history."

Ang AMA ay ang SOURCE o PINAGMUMULAN ng LAHAT: ng KALOOBAN, ng KAGUSTUHAN ng DIYOS.

Ang ANAK, si Hesu Kristo o ang Salita, ay SIYANG KARUNUNGAN at KAPANGYARIHAN ng DIYOS. Sa pamamagitan ng ANAK ay INIHAHAYAG ng AMA ang KANYANG KALOOBAN at KAGUSTUHAN.

Ang ESPIRITU SANTO ang TAGAGANAP o NAGKUKUMPLETO sa KALOOBAN ng DIYOS AMA at KAPANGYARIHAN ng ANAK.

Sa mula't-mula pa ay MAGKAKASAMA na SILANG TATLO at IISA ang PAGKILOS kahit MAGKAKAIBA ang PAPEL sa pagka-DIYOS.

At kung babasahin natin halimbawa kung paano nilikha ng Diyos ang lahat ng bagay ay makikita natin ang papel na ginampanan ng bawat isa.

Basahin natin ang Genesis 1:2, "Ang daigdig ay walang porma at walang laman, ang ibabaw ng kalaliman ay balot ng kadiliman, at ang ESPIRITU ng DIYOS ay pumaibabaw sa mga tubig."

(Ayan ang ESPIRITU SANTO.)

Sa verse 3, "At SINABI ng Diyos, ‘Magkaroon ng liwanag,’ at nagkaroon ng liwanag."

Ang AMA ang NAGSALITA o NAGHAYAG ng KANYANG KALOOBAN at ang ANAK (although noon ay hindi pa siya kilala bilang Anak) ang SALITA na NAGPAKILALA sa KALOOBAN ng AMA.

Iisa sila at magkakasama silang gumagawa bilang Diyos. Sabi sa John 14:10, "Hindi ba kayo naniniwala na AKO AY NASA AMA at ANG AMA AY NASA AKIN? Ang mga salita na sinasabi ko sa inyo ay hindi lang sa akin. Sa kabilang dako, ANG AMA na NANANAHAN sa AKIN, ang gumagawa ng kanyang gawain." Magka-iba sila pero magkasama o IISA.

Para ‘yang Iglesia, MARAMI tayong miyembro at IBA-IBA ang ating ginagampanang papel. Pero tayong lahat ay bahagi ng IISANG IGLESIA.

Iba-iba tayo bilang ‘INDIVIDUAL’ na miyembro pero pare-pareho ang ating dignidad bilang kasapi ng IISANG Simbahan.

Ganoon ‘yon, Cherry.