Iglesia ni Cristo dapat ba supalpalin?

AGOSTO 8, 2003


MAY napansin si Chairman Jess Patricio ng Pasay City sa column natin noong Aug. 2. Sabi niya, "46" ang bilang ng aklat sa KUMPLETONG Old Testament at sa kabuohan ay "73" ang kasama sa KUMPLETONG Bibliya.

Ganito naman ang sabi ni Ody ng Lapasan CDO, "Paki-check kung 45 talaga ang Old Testament dahil sa RDV (Rheims-Douay Version), NAB (New American Bible), THB at mga Biyaya ay 46."

May dagdag na tanong pa si Ody. Ang sabi niya, "Tama ba ang spelling o ang salitang ‘Tanak’ na Bible ng mga Hudyo?"

Maraming salamat po sa puna ninyo, Chairman Jess at Ody. Tama po kayo, 46 nga ang bilang ng LAHAT ng aklat na kasama sa KUMPLETONG Old Testament. (NAITUWID NA NATIN ITO SA ARTIKULO NOONG AGOSTO 2, 2003)

Nagkaroon po ng konting aberya noong isinulat ko ang column. Ang lumabas po ay "45" imbes na "46." Pasensya na kayo kung nakalikha ito ng konting kalituhan.

Salamat po uli sa mga nakapuna.

Tungkol naman po sa tanong ni Ody na kung tama ang spelling ng "Tanak," "tama" po ‘yan batay sa GAMIT at BIGKAS.

Ang ORIHINAL kasi na pinatutungkulan ng "Tanak" ay ang mga letrang "TNK" na acronym ng T-orah, N-eviim, K-etuvim.

Ang "Torah" o "Law" ay binubuo ng LIMANG AKLAT NI MOISES: Ang Genesis, Exodus, Numbers, Leviticus at Deuteronomy.

Ang "Neviim" o "Prophets" ay binubuo ng 9 na "major prophets" at ng 12 na "minor prophets."
Samantala, 13 sulat at aklat naman ang kasama sa "Ketuvim" o "Writings."

Binubuo ng mga ito ang "TNK" (bigkas ay "tanak") na "bibliya" ng mga Hudyo.

+ + +

Ganito naman ang sabi ni Linda Sanidad ng Salawag, Cavite, "Ang mga Katoliko mga mamamatay tao, magnanakaw, switik, mangangalunya kasama ang mga PARI. Nasaan ang aral?"

Huwag sana tayong masyadong mapaghusga sa ating kapwa, Linda. Lahat ng mga Katoliko ay nagi nang "mamamatay tao, magnanakaw, switik, mangangalunya." Hindi naman yata tama ‘yon.

Pero hindi ikaw ang sinisisi ko kung bakit ganyan ang tingin mo sa mga Katoliko. Mayroon kasing ilang mangangaral diyan na "MAPANIRANG PURI" o slanderer at ganyan ang itinuturo sa kanyang mga miyembro.

Ang mga mangangaral na iyan ang binabanggit sa Bibliya na dapat nating iwasan ayon sa 1 Corinthians 5:11.

Ganito ang sabi ng talata, "Ngayon ay isinulat ko sa inyo na huwag kayong makikisama sa sinuman na tumatawag sa sarili niya ng kapatid [brother] pero siya naman ay nakikiapid, o mapag-imbot, sumasamba sa diyus-diyosan, o MAPANIRANG PURI, o manginginom, o kaya ay manunuba. Ni huwag kayong makikisama sa kanya sa pagkain."

Ang ganyan kasing "mangangaral" (kahit pa NAGPAPATAWAG siya na BROTHER) ay kasama sa binababala ng Panginoon sa Matthew 7:15 at 24:11.

Sabi sa Mt 7:15, "Magbantay laban sa mga huwad na propeta. Darating sila na nakasuot ng damit tupa pero sa loob ay MABABANGIS silang ASONG GUBAT."

Ibig sabihin, magpapakita sila ng kabutihan at tutulong pa sa nangangailangan pero ang kalooban nila ay puno ng KABANGISAN, isa na nga riyan ang PANINIRANG PURI.

Sabi naman sa Mt 24:11, "Maraming huwad na propeta ang LILITAW at LILINLANG sa maraming tao."

Huwag sanang magagalit si Linda dahil nakikita natin na isa siya sa mga NALINLANG ng isang huwad na propeta na LUMITAW kailan lamang.

Kita ninyo, nagkatotoo ang sinasabi ni Hesus sa Mt 7:17, "Ang isang mabuting puno ay nagbubunga ng mabuting bunga pero ang MASAMANG PUNO ay NAGBUBUNGA ng MASAMANG BUNGA."

No offense meant, Linda. Nagmamalasakit lang po ako sa inyo.

+ + +

Ganito naman ang sabi ni John F ng Talon, Las Piñas City, "Alam mo, hindi ka dapat nagkokolum diyan dahil gagawin mong bobo ang mga tao. Authority ka ba? Tumawag ka sa SBN 21 at itanong mo kay Soriano para matuto ka."

Salamat sa payo mo, John. Pero matagal na akong nanonood sa palabas ni Eliseo Soriano.

Sa katunayan, isa sa dahilan kung bakit ako nagkokolum ay para ITUWID ang mga KAMALIAN na itinuturo niya laban sa mga Katoliko at aral Katoliko.

Kung sa tingin mo ay mas katiwa-tiwala si Soriano sa mga sinasabi niya laban sa mga Katoliko ay nasa sa iyo ‘yon.

Ang sa akin lang kasi ay mas nasa posisyon ako at mas may karapatan bilang Katoliko na ipaliwanag ang pananampalatayang Katoliko kaysa kay Soriano.

Ano ba ang aasahan mo na KATOTOHANAN tungkol sa Katolisismo kung ang magsasalita ay isang taong KONTRA sa Katolisismo at lumalabas na anti-Katoliko?

+ + +

Sabi naman ni EJ ng QC, "Nanood ako sa Net 25. Iglesyang itinalikod at inquisition ang topic nila kaya mga Iglesia ang tumitira sayo kaya supalpalin mo lagi sila."

Alam mo, EJ, kung tutuusin ay walang dapat pagtalunan ang Iglesia Katolika at Iglesia ni Cristo.

Kung nabasa mo ang mga nauna kong column, ipinakita ko na ang Iglesia Katolika ay ITINATAG ni Kristo noon pang narito Siya at mati-trace ito pabalik sa mga Apostol.

Samantala, aminado ang INC na si Felix Manalo ang nagtatag sa grupo nila noong 1914.

IPINAKITA na natin sa Bibliya na ang Iglesiang itinatag ni Kristo ay HINDI puwedeng MAITALIKOD dahil si Kristo mismo ang "ulo" nito. (Ephesians 4:15; 5:23) at ang Gabay ay ang Espiritu Santo (John 16:13).

Kaya nga ang Iglesia Katolika ay halos 2,000 taon na samantala, ang INC ay 89 years pa lang.

Kaya wala tayong pagtatalo roon. Sa katunayan, sila pa ang nagsasabi na noon pa mang unang siglo ay NAROON na ang IGLESIA KATOLIKA.