Tunay na mangangaral paano makikilala?

HULYO 26, 2003

SA MARTES o Miyerkules natin itutuloy ang palitan ng paliwanag sa pagitan natin at ni AJ Reyes ng Cavite. Ito ay para mabigyan ng pagkakataon at ng espasyo ang lahat.

Noong isang Sabado ay tinalakay natin ang mga TANDA ng isang HUWAD na MANGANGARAL.

Ngayon ay paguusapan naman natin kung paano makikilala ang mga TUNAY NA MANGANGARAL.

+ + +

Una, ang TUNAY na mangangaral ay sa MISMONG Panginoong Hesus galing ang PAGKASUGO.

Sabi sa John 20:21 kung saan sinabi ng Panginoon sa mga apostol, "Sumainyo ang kapayapaan! Kung paanong ako ay sinugo ng Ama, KAYO RIN AY SINUSUGO ko."

"Pagkasabi noon ay inihinga niya sa kanila ang Espiritu Santo, ‘Tanggapin ninyo ang Espiritu Santo. Kung patawarin ninyo ang kasalanan ng isang tao iyon ay pinapatawad; kung hindi ninyo ito patawarin, hindi ito pinapatawad."

Malinaw sa talata na si Hesus ang nagsugo sa mga Apostol.

Samantala, ang kapangyarihan na tinanggap ng mga Apostol ay ipinasa naman nila sa iba sa pamamagitan ng PAGPAPATONG NG MGA KAMAY.

Ganito ang sabi sa Acts 6:3-7, "Mga kapatid, pumili kayo ng pitong lalaki mula sa hanay ninyo na puno ng Espiritu at karunungan."

"IBIBIGAY NAMIN SA KANILA ang RESPONSABILIDAD na ito at ibibigay ang aming atensyon sa panalangin at sa gawain para sa salita."

"Nalugod ang buong grupo sa panukalang ito. Pinili nila si Stephen, isang tao na puno ng pananampalataya at ng Espiritu Santo; gayundin si Philip, Procorus, Nicanor, Timon, Parmenas at Nicolas mula sa Antioch, na naging Hudyo."

"Iniharap nila ang mga ito sa mga apostol na nanalangin at NAGPATONG NG KANILANG MGA KAMAY SA MGA ITO."

"Sa gayon, kumalat ang salita ng Diyos. Ang bilang ng mga alagad sa Herusalem ay mabilis na dumami at malaking bilang ng mga PARI ang sumunod sa pananampalataya."

Maliwanag na ang tinanggap na kapangyarihan ng mga Apostol ay IPINASA NILA SA IBA.

Ang pagpapasa-pasa ng kapangyarihang ito ay NAGTULOY-TULOY mula noong UNANG SIGLO hanggang sa ngayon.

Kaya nga ang mga TUMANGGAP ng kapangyarihang ‘yan ay HINDI lang nangangaral, sila rin ay NAGPAPATAWAD ng mga KASALANAN sa ngalan ng Panginoong Hesus sangayon sa sinasabi sa John 20:21.

Kung hindi nabigyan ng KAPANGYARIHAN para MAGPATAWAD ng KASALANAN ang isang mangangaral, masasabi kaya natin na TUNAY ‘YAN?

+ + +

Ang pangalawang TANDA ng TUNAY na mangangaral ay KASAPI SIYA sa IGLESIA na ITINATAG NI KRISTO sa Matthew 16:18.

Sabi ng talata, "At sinasabi ko sa iyo: Ikaw ay Pedro at sa ibabaw ng batong ito ay ITATAYO KO ANG AKING IGLESIA. Hindi makakapanaig sa kanya ang pintuan ng Hades."

Sa mga kasapi kasi ng Iglesiang ito IBINIGAY ng Diyos ang Kanyang Espiritu -- ang ESPIRITU NG KATOTOHANAN.

Mababasa ‘yan doon din sa John 20:21 at sa Acts chapter 2.

Ang TAMANG ARAL ng DIYOS ay galing sa Espiritu Santo. Sabi sa Jn 16:13, "Pero pagdating ng Espiritu ng KATOTOHANAN, GAGABAYAN niya kayo sa LAHAT ng KATOTOHANAN."

Dahil nga riyan, ang Iglesiang ITINATAG ni Kristo noon pang UNANG SIGLO ay tinawag nang "HALIGI at SALIGAN ng KATOTOHANAN." (1 Timothy 3:15).

+ + +

So, dalawa ang MAHALAGANG TANDA ng TUNAY na MANGANGARAL. Una ay GALING kay KRISTO ang kapangyarihan nila sa PANGANGARAL at maging sa PAGPATAWAD ng KASALANAN.

Hindi lang ito INANGKIN kundi IBINIGAY at IPINASA mula sa mga Apostol sa pamamagitan ng PAGPAPATONG ng KAMAY.

Pangalawa, ang TUNAY na mangangaral ay KASAPI ng IGLESIANG itinatag ni Kristo. Sa Iglesiang ito kasi NAGMUMULA ang KATOTOHANAN na bigay ng TUNAY na ESPIRITU ng Diyos.

Dahil sa dalawang ito, makatitiyak tayo na ang ARAL nila ay GALING sa DIYOS, KATOTOHANAN at WALANG KALIKUAN.

+ + +

Pero hindi doon natatapos ‘yon. Ang mga TANDA na iyan ay MULA SA DIYOS. Ang bawat isang mangangaral, LALO PA KUNG SIYA AY TUNAY, ay may mga katangiang dapat ay taglay niya sa KANYANG SARILI.

May mga sinasabi ang Bibliya tungkol dito. Ang ilan rito ay nasa 1 Tim 3:1-13. Basahin natin ang mga katangian: Siya ay dapat na HINDI MAPUPULAAN; isa lang ang asawa (kung may asawa siya); may kontrol sa sarili, kagalang-galang, bukaspalad, marunong magturo, hindi lasenggo, HINDI BAYOLENTE, HINDI PALA-AWAY; hindi matakaw sa pera at iba pa.

Sa madaling salita, ang isang TUNAY na MANGANGARAL ay isang mabuting tao, banal, mabuting halimbawa sa kanyang kapwa at komunidad. HINDI SIYA PALAMURA at HINDI MAPANIRANG PURI.

Marami ngayon ang nagpapakilalang mangangaral daw. Marami ang napapaniwala nila pero DAPAT BA TAYONG MANIWALA SA KANILANG MGA SINASABI?

’Yan ang topic natin bukas.