Scapular at lucky charm pareho ba?

NABASA ni AM ng Leyte ang mga sinulat natin tungkol sa Deuterocanonica at Apocrypha at naisipan niyang mag-text.

Ganito ang sabi niya, "Hi, Cenon. Isa ako sa napakarami mong tagasubaybay ng napakaganda mong column. Itatanong ko lang kung paano malalaman kung Deuterocanonica o Apocrypha ang isang Bibliya?"

Dagdag pa niya, "Nabasa ko rin ang tungkol sa lucky charm. Paano ang iskapolaryo? Bawal din bang gamitin ‘yon?"

Salamat sa text mo, AM at sa interes mong malaman ang pagkakaiba ng Bibliya na Deuterocanonica at Apocrypha.

Mahalagang isyu ang tungkol sa pagkakaroon ng Deuterocanonica ng isang Bibliya dahil dito ay makikita natin kung TAMA o MALI ang Bibliya na gamit natin.

Kung hindi pa alam ng iba sa atin, may mga Bibliya na BINAWASAN ng mga libro kaya KULANG ang laman ng mga ito.

Ang INALIS na mga libro na ito ay ang tinatawag na DEUTEROCANONICA.

Kaya nga natutuwa ako sa interes ni AM. Ipinapakita lang nito na hangad niyang malaman kung alin ang TAMANG BIBLIYA at alin ang mali.

u u u

Kaugnay sa tanong ni AM kung paano makikilala ang Bibliyang may Deuterocanonica at alin ang Apocrypha lang ay heto po ang mga palatandaan.

Isang agarang tanda ay may NAKALAGAY na "With Deutecanonicals" o "With Apocrypha" sa pabalat ng Bibliya.

Kung makakabuklat tayo ng Bibliya na may tatak na "With Deuterocanonicals" ang mga aklat ng INALIS ng mga Protestante ay NAKAHALO o NAKASAMA sa ibang aklat sa Old Testament.

Kung ang Bibliya naman na may tatak "With Apocrypha" ang bubuklatin natin, ang mga aklat na INALIS ay NAKAHIWALAY. Usually ay nasa likod ng Bibliya.

Pangalawang pagkakaalaman ay kapag Bibliya ng Katoliko o Catholic Bible (ang tanda nito ay may KRUS sa cover) tiyak na mayroon itong Deuterocanonica.

Kung walang KRUS ang cover ng Bibliya ay malamang na ito ay sa Protestante o sa ibang grupo na gumagamit ng KULANG na Kasulatan.

Ganoon ‘yon, AM.

u u u

Tungkol naman sa lucky charm at sa ISKAPULARYO, HINDI "lucky charm" ang SCAPULAR. MAGKA-IBA ang dalawang ito.

Ano ba ang masasabing "lucky charm?"

Ito ay isang bagay o gamit na pinaglalagyan ng tiwala o kumpiyansa ng isang tao.

Sa "lucky charm," ang bagay o gamit mismo ang pinagkakatiwalaan o dito inilalagay ang pagtitiwala.
Kaya nga may mga tao na hindi makaalis ng bahay kung wala ang kanilang "lucky charm."

Sa kabilang dako, ang scapular ay isang bagay na ang layunin ay PALAGING IPAALALA sa isang tao sa PANGAKONG TULONG ng Birheng Maria sa may suot nito.

Ang kagandahan ng scapular ay mayroon itong basbas o bendisyon ng pari na kumukuha ng kapangyarihan mula mismo sa Panginoong Hesus.

Nakabatay ‘yan sa John 20:21-22 na ganito ang sabi, "Muli ay sinabi sa kanila ni Hesus: Sumainyo ang kapayapaan! Kung paanong sinugo ako ng Ama ay SINUSUGO ko rin kayo."

"Pagkasabi noon ay HUMINGA siya sa kanila at nagsabi: Tanggapin ninyo ang Espiritu Santo."

Ang pagtanggap na ito ng Espiritu Santo ng mga Apostol ay ipinasa nila sa mga taong humalili o pumalit sa kanila. At ito na nga ang mga pari na TUMANGGAP DIN ng Espiritu Santo.

Sa pamamagitan ng Espiritu Santo na ito ay NAGBABASBAS ang mga pari.

Magandang malaman na WALANG IBANG PUNO ng anumang grupong panrelihiyon ang BINIGYAN at TUMANGGAP ng Espiritu Santo liban sa mga Apostol, obispo at pari.

At dahil sa kapangyarihan na bigay ng Espiritu Santo ay nagbebendisyon ang mga pari ng mga bagay tulad ng Iscapularyo para maging daluyan ng biyaya at pagpapala.

Pero tulad ng iba pang bagay na panrelihiyon, WALANG BISA ang SCAPULAR kung WALANG PANANAMPALATAYA sa Diyos ang nagsusuot nito.

Basahin natin itong sinasabi sa Matthew 9:20-22, "Sa pagkakataong iyon, isang babae na may pagdurugo sa loob ng labing dalawang taon ang lumapit sa likod niya at hinipo ang laylayan ng kanyang balabal."

"Sinabi niya sa kanyang sarili: Mahawakan ko lang ang kanyang balabal ay gagaling na ako."

"Lumingon si Hesus at nakita siya. ‘Magalak ka, anak,’ sabi niya, ‘PINAGALING KA NG IYONG PANANAMPALATAYA.’ At ang babae ay GUMALING mula sa sandaling iyon."

Ganoon din ‘yon sa SCAPULAR, AM. Isa ito sa mga bagay na nagpapakita ng PANANAMPALATAYA ng isang tao sa Diyos.

Kahit hindi ka magsuot ng Scapular ay mananatili ang pagmamahal ng Diyos sa iyo.

Pero NAKAKATULONG ito dahil mayroong bagay na palaging NAGPAPAALALA sa iyo ng mga dapat mong gawin bilang Kristiyano.

Ibig sabihin, kahit magsuot ng scapular ang isang tao kung hindi naman siya nananampalataya o sumusunod sa utos ng Diyos at Iglesia ay bale wala rin ito.

Deuterocanonica o Apocrypha?

AGOSTO 10, 2003


PINAG-UUSAPAN natin ang ginawang PAGBAWAS ng mga Protestante sa ilang aklat na tinanggap ng Iglesiang Kristiyano mula sa Panginoong Hesus at sa mga Apostol.

Kaugnay nito ay nag-text sa atin si AJ Reyes ng Cavite at ang reader natin na nagpapakilalang si "Timoteo Pablo" ng Quezon City.

Ang napansin ko sa mga text nila ay ginamit nila ang salitang "apocrypha" sa pagtukoy nila sa 7 aklat na INALIS ng mga Protestante at ngayon ay INALIS na rin ng marami pang ibang grupo.

Nahalata ko na NAISAKSAK na sa kanilang mga isip ang salitang "apocrypha" dahil paulit-ulit pa rin nila itong ginamit sa kabila ng paliwanag ko na "deuterocanonica" ang TAMANG tawag sa mga aklat na KASAMA sa Kasulatan na GINAMIT ni Hesus at ng mga Apostol.

Naitanong pa ni Timoteo Pablo, "Hindi ba pareho lang ang mga ito?"

Ang sagot ay PAREHO ang mga tinutukoy na aklat pero MAGKA-IBA ang ibig sabihin ng "apocrypha" at ng salitang "deuterocanonica." At kung hindi tayo mag-iingat ay MAGKAKAMALI tayo ng pag-unawa sa mga ito.

Paano sila nagkaiba?

Ang "apocrypha" ang ginagamit na salita ng mga taong KAKUNTSABA sa PAGBAWAS ng mga aklat mula sa KUMPLETONG Kasulatan.

Ang ibig sabihin kasi ng "apocrypha" ay "hidden" o "natatago."

Sa paggamit nila nito ay gustong palabasin ng mga NAGBAWAS sa Kasulatan na "palihim" o "sikretong isiningit" ng mga Katoliko ang 7 aklat na kasama sa KUMPLETONG Old Testament.

Dahil diyan ay doble ang nakikita kong KAMALIAN sa paggamit ng salitang "apocrypha."

Una ay SILA ang NAGBAWAS sa mga aklat na KINILALA at TINANGGAP ng mga Kristiyano sa loob ng 1,400 hanggang 1,500 taon, tapos ay ang mga Katoliko ang pagbibintangan nila na "nagtago" ang mga ito.

Pangalawa, matapos nilang BAWASIN ang 7 aklat na ito ay PAGBIBINTANGAN nila ang mga Katoliko na NAGDAGDAG o NAGSINGIT ng mga ito sa Bibliya.

Sa palagay ko ay HINDI MAKATARUNGAN ang bagay na ginawa nilang ito. At sa tuwing gagamitin nila ang salitang "apocrypha" ay INUULIT at IGINIGIIT nila ang dalawang malaking PAGKAKAMALI na iyan.

Sabagay, marami naman silang sinasabi at IBINIBINTANG laban sa mga Katoliko na MALI naman.

Nariyan ang pagbintangan ang mga Katoliko na NAGPAPABAYAD sa BINYAG at KASAL, SUMASAMBA raw ang Katoliko sa mga rebulto, na HUMIHINGI ng TULONG sa mga PATAY (kina Maria at mga santo) at marami pang ibang KASINUNGALINGAN.

Diyan ay nagkakatotoo ang sabi ni Hesus sa John 15:20, "Tandaan ninyo ang mga salita sinabi ko sa inyo: Walang alipin na higit sa kanyang panginoon. Kung INUSIG nila ako, kayo man ay UUSIGIN nila."

Paano ba inusig ang Panginoon? Ganito ang sabi ng Matthew 26:59, "Ang mga punong saserdote at buong Sanhedrin ay NAGHANAP ng HUWAD na PATOTOO laban kay Hesus para maipapatay nila siya."

Ngayon, hindi ba HUWAD na PATOTOO ang ginagawa ng mga BUMABATIKOS sa mga Katoliko sa ngayon?

Isa na nga riyan ang paggamit ng salitang "apocrypha" para palabasin na NAGDAGDAG ng Iglesia Katolika ng mga aklat sa Bibliya. Ang KATOTOHANAN naman ay sila ang NAGBAWAS dito.

Hindi lang iyon. Katakot-takot pa na pang-iinsulto at panlalait ang inaabot ng mga Katoliko nang dahil sa kanilang pananampalataya.

Pero sinasabi ni Kristo na hindi dapat masiraan ng loob ang mga alagad niya na INUUSIG.

Ganito ang sabi sa Mt 5:11, "PINAGPALA KAYO kung INIINSULTO at INUUSIG kayo at PINAGBIBINTANGAN ng kung anu-anong KAMALIAN nang dahil sa akin."

Ipinaliwanag ng Panginoon kung bakit may mga taong gumagawa ng ganito. Sabi niya sa Mt 15:19, "Dahil mula sa puso ay lumalabas ang MASASAMANG PAG-IISIP, pagpatay, pakikiapid, pangangalunya, pagnanakaw, HUWAD NA PATOTOO at PANINIRANG PURI."

Ngayon, ano ba ang tawag sa mga aklat na DATI nang TANGGAP ng Iglesiang Kristiyano pero BINAWAS ng mga Protestante?

Ang tawag sa mga ito ay "DEUTEROCANONICA" o "DEUTEROCANONICALS" sa Ingles.

Ang ibig sabihin ng "Deuterocanonica" ay "dalawang beses idineklarang galing sa Diyos." Ang kahulugan kasi ng "deutero" ay "dalawa" at ang "canonica" ay "batayan ayon sa ‘hininga’ o inspirasyon ng Diyos."

Bakit kailangang dalawang beses ideklarang galing sa Diyos ang mga kasulatan na ito?

Ganito ang dahilan. Noon pa man na unang MABUO ang Bibliya sa Council of Hippo (393 A.D.) at Council of Carthage (397 A.D.) ay IDINEKLARA nang "inspired" o "galing sa Diyos" ang 7 aklat na ito.

Ibig sabihin, noon pa man ay "INSPIRED" na ang mga ito.

Noong LUMITAW ang mga Protestante ay GUMAWA sila ng kontrobersiya laban sa mga aklat na ito at KINUWESTIYON ang pagiging "inspired" nila. At marami silang NAILIGAW ng paniniwala.

Dahil dito, kinailangang ideklara uli sa PANGALAWANG BESES ng Iglesia Katolika sa Council of Trent noong 1546 na "INSPIRED" nga ang mga aklat na ito.

Ito ang dahilan kung bakit "deuterocanonical" ang tawag sa kanila.

Ibig sabihin ay PINANINDIGAN ng Iglesia ang GINAWA ni Hesus at ng mga Apostol na PAGTANGGAP at PAGGAMIT sa mga aklat na kasama sa SEPTUAGINT o ang Kasulatan na nasulat sa Griego.

So, ano ba ang Bibliya na hawak ninyo? Ang Bibliya na BINAWASAN at MINALI o ang Bibliya na KUMPLETO at PINANINDIGAN ng mga tagasunod ni Kristo?

Kumpleto ba ang gamit mong Bibliya?

AGOSTO 2. 2003


SA LABAS ng espasyong ito sa TUMBOK ay nagkakapalitan din kami ng text ni AJ Reyes ng Cavite. Marami siyang tanong at sinasabi na sayang at hindi natin agad mailagay rito.

Sa isang palitan namin ng tanong at paliwanag ay biglang INAMIN ni AJ na HINDI KAILANGANG NASUSULAT ang paniniwala. IGINIIT niya na PUWEDE NA ANG DIWA ng paniniwala.

Tulad nga ng sabi ko noon, GANYAN ang paniniwala ng Iglesia Katolika sa isyung ito. Hindi kailangang NASUSULAT o LETRA POR LETRA sa Bibliya ang paniniwalaan ng isang Kristiyano.

Kaya nga ang mga paniniwala ng mga KATOLIKO ay TIYAK na MAY BATAYAN sa Kasulatan although HINDI nasusulat ng LETRA POR LETRA.

TIYAK din na HINDI ito SUMASALUNGAT sa TUNAY na aral ng Bibliya.

MARAMI kasing aral na NAGSULPUTAN KASABAY ng PAGLITAW ng mga HUWAD na "mangangaral" at "propeta."

Isa na nga riyan ang paggiit ng mga BAGONG LITAW na mangangaral na Bibliya LANG ang batayan ng pananampalataya.

Napatunayan na natin na ang mismong aral na iyan ay SALUNGAT sa ARAL ng Bibliya.

PATUNAY nga ang PAGKAKAROON ng ARAL sa SALITA o ORAL TRADITION na sinasabi sa 2 Thessalonians 2:15, 2 John 1:12 at 2 Timothy 2:2.

+ + +

Ang NAKAKATAKOT sa BAGONG ARAL nitong mga BAGONG LITAW na mangangaral ay HINDI NILA TUNAY na NAUUNAWAAN ang kanilang mga sinasabi.

Isang patunay riyan ang mismong Bibliya na kanilang ginagamit.

Kahapon ay itinanong sa akin ni AJ kung ang Bibliya ko raw ay may "APOCRYPHA."

Ano itong "apocrypha" o "apocryphal books?"

Ito ay ang mga AKLAT at SULAT na KASAMA sa Bibliya MULA PA NOONG UNA pero INALIS o IBINAWAS ng mga BAGONG LITAW na mangangaral.

Para maintindihan natin ito, mahalagang malaman natin na IBANG-IBA ang ITSURA ng Bibliya natin ngayon sa mga KASULATAN na natanggap ng mga Apostol noong unang siglo.

Ngayon ay nasa iisang "libro" na ang mga Kasulatan. Nahahati na rin ito sa Old and New Testament.
Noon ay walang Old at New Testament. Hindi rin magkakasama ang mga Kasulatan na nakalagay sa hiwa-hiwalay na mga "kalatas" o "scrolls."

Noong matatag ang tunay na Iglesia ni Kristo ay kinulekta ng mga ito ang mga Kasulatan na TINATANGGAP nila na GALING sa DIYOS.

Inipon nila ang mga ito at nakakulekta sila ng 45 na iba’t-ibang KASULATAN. Ang mga Kasulatan na ito ang nabuo bilang Old Testament.

Sa loob ng mahigit 1,400 taon ay KINILALA ang 45 na libro na ito bilang "INSPIRED" o GALING SA DIYOS.

Pero noong LUMITAW ang mga "propeta" at "mangangaral" ng Protestant Reformation ay BINAWASAN nila ang mga librong ito.

Ang PAGBAWAS nila sa mga aklat at sulat na ito ay LABAG sa SINASABI ng Revelation 22:19, "At kung mayroong mag-aalis ng mga salita mula sa aklat ng pahayag na ito, AALISIN din ng Diyos ang kanyang bahagi sa puno ng buhay at sa banal na lungsod na inilalarawan sa aklat na ito."

Pansinin ninyo, "salita" pa lang ang aalisin ay AALISIN na sa kanila ang "bahagi sa puno ng buhay." Paano kung buo-buong AKLAT ang kanilang INALIS? Ano na ang mangyayari sa kanila?

Ano ‘yang mga INALIS nila? ‘Yan nga ang tinatawag nilang "apocrypha" na sinasabi nila ay HINDI RAW KASAMA sa Banal na Kasulatan.

Kaya nga mapapansin ninyo na ang mga Bibliya ng mga BAGONG LITAW ay KULANG dahil 66 lang ang libro rito.

Samantala, ang ORIGINAL na bilang ng mga libro ng Bibliya ay 73 lahat. Sa Old Testament ay 46 libro at sa New Testament ay 27.

KULANG ang mga Bibliya ng BAGONG LITAW dahil INALIS o IBINAWAS na rito ang mga aklat ng Baruch, Judith, Sirach, Tobit, Wisdom, and 1 and 2 Maccabees.

INALIS o IBINAWAS din nila ang ilang bahagi ng aklat ni Daniel at Esther.

Dahil dito, KULANG ang kanilang OLD TESTAMENT na mayroon lang 39 na libro kumpara sa ORIGINAL na 46.

Ngayon, sa punto pa lang na ito ay paano nila masasabi na dapat na gawing batayan ang Bibliya kung ang HAWAK NILANG BIBLIYA AY KULANG?

Bukas ay ipagpapatuloy natin ang usaping ito para mas malinaw.