Makikita ba sa Bible ang Holy Trinity?

September 1, 2003

MAGANDANG araw ng Lunes po sa inyong lahat. Simulan po natin ang linggo sa mga text nina Dario ng Zamboanga City at ni RB ng Taguig na parehong nagtatanong tungkol sa Holy Trinity.

Ganito ang tanong ni Dario, "Mr. Bibe, bakit daw may tatlong persona ang Diyos samantalang dalawa lang ang tinutukoy ng Bibliya: ang Ama at ang Anak."

Tanong naman ni RB, "Paano mo ipaliliwanag ang tatlong persona ng Diyos kung ibabatay natin sa Bibliya? Simula Geneses hanggang Revelations may mababasa ka bang Trinity?"

Thanks sa napakagagandang mga tanong ninyo, Dario at RB.

Una, uulitin ko lang ang palagi kong pinupunaNG PAGKAKAMALI ng maraming BAGONG LITAW na mangangaral.

Ito ang sabi nila na ang LAHAT ng bagay sa PANANAMPALATAYA ay KAILANGANG NASA BIBLIYA.

PAGKAKAMALI rin ang sinasabi nila na BIBLIYA LANG ang BATAYAN ng PANANAMPALATAYA.

Kaugnay nito, gusto kong sabihin na ang Iglesia Katolika ay naniniwala rin sa Bibliya. Pero sinasabi nito na HINDI LAHAT ay NAKALAGAY o NABANGGIT sa Bibliya.

Bibliya mismo ang nagsasabi sa 2 Thesalonians 2:15 na MAY MGA ARAL o TRADISYON na SINABI LANG (ORAL o SACRED TRADITION). Ito ay IBA sa mga aral o tradisyon na NASUSULAT.

Ganito ang sinasabi ng 2 Thes 2:15, "Kaya nga, mga kapatid, manindigan kayong matatag at panghawakan ninyo ang mga TRADISYON na ibinigay namin sa inyo, maging ito man ay sa SALITA o sa SULAT."

Iglesia Katolika LANG ang NAKAKASUNOD sa sinasabing ito ng Bibliya dahil ITO LANG ang NAGTATAGLAY ng ORAL o SACRED TRADITION.

Sa kabila nito, ang itinuturo ng KATOLISISMO ay MAY BATAYAN dapat ang Oral Tradition sa Bibliya although HINDI TUWIRANG NAKASULAT dito.

u u u

Balikan natin ang mga PAGKAKAMALI ng mga BAGONG LITAW na nagsasabi na BIBLIYA LANG ang "batayan" ng "lahat ng bagay sa pananampalataya."

Sinasabi ng ilan sa kanila na "dahil walang mababasa na salitang TRINITY sa Bibliya ay WALA na nito."

Maling-mali ito dahil ultimong ang "Bibliya" na pinagbabatayan nila ay HINDI NASUSULAT at HINDI TINUKOY sa Bibliya.

Pero hayaan na natin sila kung ipagpipilitan nila ang MAGKAKONTRA nilang paniniwala. Kung ipipilit din nila ang MALING PANINIWALA ay nasa kanila na ‘yon.

Diyos na ang bahala sa kanila. Hindi tayo ang huhusga. Tayo ay nagpapahayag lang ng KATOTOHANAN.

Isa sa mga KATOTOHANAN na iyan ay ang HOLY TRINITY o BANAL NA SANGTATLO.

u u u

Ngayon, ano ang batayan ng HOLY TRINITY sa Bibliya.

Ang pinaka-tuwirang batayan ay ang pagkakaroon ng Diyos ng IISANG PANGALAN at ang pagtukoy ng pangalan na ito sa Ama, Anak at Espiritu Santo ayon sa Matthew 28:19.

Tingnan natin ang sabi ng talata, "Binyagan ninyo sila sa NGALAN ng AMA, ng ANAK at ng ESPIRITU SANTO."

IISA ang PANGALAN pero TATLO ang pinatutungkulan. Dito ay KASAMA ng Diyos Ama at Diyos Anak ang ESPIRITU SANTO.

Sa paggamit ng salitang "AT" bago sa Espiritu Santo ay ipinapakita ng Bibliya ang pagkakaTULAD at pagiging PANTAY ng Espiritu sa Ama at Anak.

Sa "grammar" kasi, ginagamit ang salitang "AT" para ipakita na ang nauunang salita ay KAPANTAY o KAPAREHO ng sumusunod na tinutukoy na salita.

Kaya kung Diyos ang Ama at ang Anak ay DIYOS DIN ang ESPIRITU SANTO.

u u u

Pansinin din natin na mula sa Genesis hanggang sa Revelation ay madalas na MAGKASAMANG KUMIKILOS ang Ama, Salita (si Hesus ayon sa John 1:1) at Espiritu Santo.

Sa Genesis 1:2-3 ay ganito ang sinasabi, "Ang daigdig ay walang hugis at walang laman, ang kadiliman ay nasa ibaba ng kalaliman, at ang ESPIRITU ng DIYOS ay pumapaibabaw sa mga tubig."

"At SINABI ng Diyos: Magkaroon ng liwanag, at nagkaroon ng liwanag."

Makikita natin dito ang ESPIRITU, ang AMA (Diyos) at ang SALITA ("Sinabi"). Mula pa noong simula ay NAROON na silang tatlo.

Sa simula ng MINISTRY ni Hesus sa Matthew 3:16-17 ay naroon uli ang HOLY TRINITY.

Sabi rito, "Matapos na mabautismuhan si Hesus, umahon siya sa tubig."

"Sa sandaling iyon bumukas ang langit at nakita niya na bumababa ang ESPIRITU ng DIYOS na tulad ng isang kalapati at dumapo sa kanya [kay Hesus]."

"At isang boses mula sa langit ang nagsabi, "Ito ang aking Anak na aking minamahal; sa kanya ako ay lubos na nalulugod."

Maaring wala ngang salitang "TRINITY" pero IPINAKIKITA sa Bibliya ang "HOLY TRINITY."

Nasa Bibliya ba ang Holy Trinity?

HETO ang iba’t-ibang reaksyon sa mga column ko nitong nakaraang Sabado at Linggo.

u u u

Nagbigay ng testimonya si Ed Rualo ng Paranaque. Sabi niya, “I’m a Catholic. I knew Jesus only by name. I came to know Him by His Words and Healings when I began reading the Bible. And the Lord touched me.”

Congratulations, Mr. Rualo. Pareho pala ang naging daan ng pagkakakilala natin sa Panginoon.

Noong bata pa ako ay tinuruan na rin kami ng aming magulang ng mga bagay tungkol sa Diyos. Noon ay masasabi ko rin na “kilala” ko si Hesus. Pero tulad mo, kilala ko lang Siya sa pangalan.

Nasimulan kong makilala nang totohanan si Lord nang magsimula akong magbasa ng Bibliya at malaman ang nilalaman ng Banal na Kasulatan.

Pero marahil ang pagkakaiba natin ay tumigil ka na sa mga “salita” at “pagpapagaling” ni Hesus na nasusulat sa Bibliya.

Ako? Nagpatuloy ako sa pagsaliksik sa iba pang katotohanan na sinasabi sa Bibliya at sa mga sinasabi ng mga tao tungkol sa Bibliya.

Natutunan kong mahalin nang husto ang Bibliya na sinaliksik ko kung paano nabuo ang mga nasusulat dito. Inalam ko kung paano nagkasama-sama ang mga kuwento tungkol kay Hesus at maging ang mga aklat at sulat na parte ngayon ng tinatanggap na Banal na Kasulatan ng mga Kristiyano.

At para maintindihan ‘yan ay kinailangan kong pag-aralan ang kasaysayan ng Kristiyanismo, ng Iglesiang Kristiyano, ng mismong Bibliya, ang mga kahulugan ng mga salita sa Bibliya at marami pang iba.

Isa nga sa nadiskubre ko sa aking pagsasaliksik ay maraming HINDI TOTOO sa mga sinasabi ang mga tinatawag na “Bible believers” patungkol sa Bibliya.

Isa na nga riyan ang sinasabi nilang “Bibliya Lang” o “dapat ay nasusulat sa Bibliya ang lahat ng gagawin, paniniwalaan o iisipin.”

Sa puntong ito ay liliwanagin ko na hindi ang Bibliya o ang mga nasusulat dito ang aking kinukuwestiyon kundi ang mga pahayag ng kung sinu-sinong “mangangaral” (daw) tungkol sa Bibliya.

Sabi nga sa 1 John 4:1,

“Minamahal, huwag magtiwala sa bawat espiritu pero subukan ang mga espiritu para makita kung sila ay sa Diyos, dahil maraming bulaang propeta ang pumasok na sa mundo.”

Marami kasi sa kanila ay gumagawa lang ng personal na interpretasyon sa sinasabi ng Bibliya. Ito ay bagay na ipinagbabawal ng Banal na Kasulatan sa 2 Peter 1:20.

Sabi ng talata,

“Alamin ninyo ito una sa lahat, na walang pahayag sa kasulatan ang puwedeng ipaliwanag ng pansariling pagkaunawa.”

Kaya nga sinusuri at sinusubukan natin ang mga sinasabi ng mga nagsulputang “propeta” at “sugo” sa ngayon para makita natin kung totoo ba sila o mga bulaan.

u u u

May pagtutol si Louie Kuizon ng VAB, Pasay City, sa paggamit ko ng salitang “tradisyon” sa 2 Thessalonians 2:15.

Ang sabi ni Louie ay “Mr. Bibe, hindi ‘tradisyon’ ang sinasabi sa talata kundi ‘katotohanan.’ Mayroong binanggit na talata si Louie pero naputol na ito.

Para sa kaalaman mo, Louie, ang pinagbasehan ko ng salitang “tradisyon” ay ang mismong orihinal na version ng 2 Thessalonians na nasusulat sa Griego.

Ang orihinal na salita sa Griego ay “paradosis” na ang tamang katumbas sa English ay “tradition” at sa Filipino naman ay “tradisyon.”

Sa Griego, ang katumbas na salita ng “katotohanan” ay “alatheia.”

Ang masamang balita ko sa iyo ay hindi nababanggit sa orihinal Greek verse ng 2 Thessalonians 2:15 ang salitang “alatheia.”

Kaya kung ako sa iyo, magdududa na ako sa Bible translation na hawak mo. Malamang ay ililigaw ka lang niyan. ‘Yan ay dahil kung may mga bulaang propeta na nagkalat sa mundo, mayroon ding salin ng Banal na Kasulatan na mali-mali. Sa halip na matulungan ka ay dadalhin ka pa niyan sa Impiyerno.

u u u

Nag-share si Nardo Pagsanhan ng Malate ng kanyang nalalaman patungkol sa “Trinity.” Ito ay reaksyon sa sinabi kong hindi makikita ang “Trinity” sa Bibliya.

Ang sabi ni Nardo ay ganito, “Ang ‘Trinity’ ay nasa 1 John 5:7 sa King James (original English) Version.”

Maraming salamat sa ipinadala mong text, Nardo pero ikinalulungkot ko na MALI ang pagkaka-translate ng King James Version sa talatang binanggit mo.

Ganito ang sinasabi ng KJV, “For there are three that bear record in heaven, the Father, the Word, and the Holy Ghost: and these three are one.”

Sa unang tingin ay tila binabanggit nga ng tatlong persona ng Holy Trinity. Pero ganito ang sinasabi sa orihinal na Greek text, “For there are three that testify:” ‘Yon lang.

Ang sumusunod na ay ang verse 8 na ganito ang sinasabi, “the Spirit and the water and the blood; and the three are in agreement.”

Nagkamali ang gumawa ng KJV. Sa katunayan, napakaraming pagkakamali sa KJV na hindi na ito katiwa-tiwala kung gagamiting batayan ng paniniwala.

Although, maraming batayan ang Holy Trinity sa Bibliya tulad ng Matthew 28:19, pero hindi ito nagbabanggit ng salitang “Trinity.”

Tulad nga ng sabi ko, ang “Holy Trinity” ay kasama sa mga “oral tradition” na sinasabi ni San Pablo sa 2 Thessalonians 2:15 at kasama sa “Sacred Tradition” ng Simbahang Katoliko.