Kasulatan bakit binawasan?

AGOSTO 9, 2003


NOONG last Saturday hanggang Monday ay pinag-usapan natin ang ginawang PAGBAWAS ng mga Protestante sa mga Kasulatan na tinanggap ng Iglesia mula sa Panginoong Hesus at sa mga Apostol.

Ipinakita natin na bago pa nagkatawang tao si Kristo ay mayroon nang DALAWANG VERSION ang mga Kasulatan. Ito ay ang SEPTUAGINT na nasusulat sa Griego at ang Tanak na nasa Hebreo.

Inilahad ko sa inyo na sa kabila ng pamilyar kay Hesus at sa mga Apostol ang parehong version ng Kasulatan, mas pinili nilang gamitin ang SEPTUAGINT. Sa katunayan ay higit sa 300 talata ang kinuha nila rito kumpara sa iilan na kinuha mula sa Tanak.

Kasunod nito ay nag-text sa akin ang reader natin na nagpapakilalang "Timoteo Pablo ng Quezon City." Sabi niya, "Sa mahigit na 300 na quotations na kinuha ni Jesus Christ at mga Apostol sa Old Testament, anu-ano sa mga ito ang nanggaling sa Septuagint?"

Napakagandang tanong niyan, Timoteo Pablo. At sana ay mailagay natin lahat dito pero dahil kulang ang ating espasyo ay magbibigay lang ako ng ilang halimbawa.

Para maliwanag na galing nga sa Septuagint ang teksto ay ilalagay rin natin ang pagkakasulat ng teksto sa Hebreo.

Unahin natin ang Matthew 1:23 na kinuha sa Isaiah 7:14.

Ganito ang sabi ng Matthew na halaw mula sa Septuagint, "Tunghayan ninyo, isang BIRHEN ang magdadalantao at magkakaanak ng lalaki, at ito ay tatawaging Emmanuel na kung uunawain ay ‘kasama natin ang Diyos.’"

Sa Hebreo ng Isaiah, ganito ang sabi, "Tunghayan ninyo, isang NAKABABATANG BABAE ang magdadalantao at magkakaanak ng lalaki, at tatawagin itong Emmanuel."

Pansinin ninyo, mas pinaboran ni Matthew ang salitang "BIRHEN" na ginamit ng Septuagint kaysa sa salitang "NAKABABATANG BABAE" na ginamit ng Tanak.

Sa Luke 3:6 ay ginamit ang mga salitang "at ang lahat ng laman [tao] ay makikita ang PAGLILIGTAS NG DIYOS."

Ito ay hango sa Is 40:5 na nasa Septuagint.

Kung babasahin natin ang mga salita na iyan sa Tanak ay ganito ang mababasa natin, "at lahat ng laman [tao] ay makikita ito NANG SAMA-SAMA."

Sa paglalahad ng ebanghelyo ni Luke, mas pinaboran niya ang sinasabi ng Septuagint na makikita ng lahat ang "PAGLILIGTAS NG DIYOS" hindi ang sinasabi ng Tanak na makikita ito ng "SAMA-SAMA."

Marami pang halimbawa pero ang punto nito ay ang SEPTUAGINT ang mas GINAMIT ng Panginoong Hesus at ng mga Apostol.

At pumapasok ang kahalagahan ng bagay na ito kapag pinag-uusapan na kung alin sa dalawang version ng Kasulatan (Old Testament) ang dapat tanggapin ng mga Kristiyano.

Mas marami kasing aklat na kasama sa SEPTUAGINT kaysa sa Tanak. Mayroong PITONG AKLAT na nasa SEPTUAGINT na WALA sa aklat ng mga Hudyo.

Bakit wala ang mga aklat na ito sa bibliya ng mga Hudyo? Dahil ITINAKWIL nila ang mga ito.
Sa madaling salita, ang pag-alis ng pitong aklat ay bunga ang GALIT ng mga Hudyo sa mga tagasunod ni Kristo Hesus.

Ang pagbawas at PAGTAKWIL na ito ay ginawa ng mga Hudyo sa Council of Jamnia (isang lungsod sa Israel) noong 100 A.D.

Noong LUMITAW ang mga Protestante, partikular si Martin Luther na TUMALIKOD sa Iglesia Katolika, INALIS nila at IBINAWAS ang mga aklat na ito sa Bibliya.

Dito ay ipapasok ko ang tanong ni Nora P. ng Davao City, "Bakit inalis ng mga Protestante ang ibang bahagi ng Kasulatan?"

Heto ang sagot, Nora.

Inalis ni Luther ang mga aklat na noong 1521 dahil ITINAKWIL na raw ito ng mga Hudyo!

Mantakin n’yo ‘yon. Ang ginamit na dahilan ni Luther ay ‘yung dahilan na ginamit ng mga GALIT SA KRISTIYANO. KUMAMPI pa siya sa mga NAGTAKWIL kay Kristo at sa Kristiyanismo.

Isa pang dahilan ni Luther ay BATAYAN kasi ng doktrina ng Purgatoryo ang isa sa mga aklat na kasama sa mga aklat na wala sa Tanak. Ito ang 2 Maccabees 12:43-46.

Hindi kasi siya sangayon sa doktrina ng Purgatoryo pero hirap siyang bumatikos dito dahil ito ay MAY BATAYAN sa KASULATAN.

Para mawala ang BATAYAN ng Purgatoryo ay INALIS NIYA ang AKLAT na BATAYAN nito.

BINAWASAN niya ang mga Kasulatan para lang masunod ang kanyang kagustuhan.

At hindi lang isang aklat ang IBINAWAS niya kundi PITO! Ganoon kalakas ang loob ng TUMALIKOD na ito sa Iglesia at pananampalataya na galing sa Panginoon at sa mga Apostol.

Ano ang ibig sabihin noon? Mas makapangyarihan pa si Martin Luther kaysa sa Diyos? Mas marunong pa ba siya sa Panginoon?

Masama ang ginawa ni Luther dahil ang pinalalabas niya ay puwedeng bawasan ng kahit na sino ang Kasulatan dahil sumusuporta ito sa isang doktrina na AYAW NILA? Tama ba ‘yon?

Ang nakakalungkot ay NAGBUNGA na ang MASAMANG BINHI na ITINANIM ni Luther.

Ngayon ay makakarinig tayo ng mga BAGONG LITAW na mangangaral na ganoon na lang kung KUMATAY ng talata ng Bibliya.

Magbabanggit sila ng mga talata at bibigyan ito ng kahulugan pero kapag binasa naman ninyo ay IBA ANG SINASABI ng BUONG KASULATAN.

Isa na nga riyan ang napaguusapan na natin na Isaiah 34:16.

Bibliya raw ang tinutukoy rito pero kapag binasa ninyo ang mga kasamang talata o ang buong chapter ay mga hayop sa Edom ang tinutukoy.

Ehemplo ‘yan ng patuloy na PAGKATAY sa Bibliya.

Ano ang Kasulatan na ginamit ni Hesus?

AGOSTO 4, 2003


KATULOY ito ng pagtalakay natin sa kung paano BINAWASAN ng mga BAGONG LITAW na mga mangangaral (daw) ang Bibliya na IBINIGAY ng DIYOS sa MGA KRISTIYANO.

Kahapon ay inilahad natin ang KASAYSAYAN kung paano NABUO ang OLD TESTAMENT.

Sinabi natin ang SITWASYON o KALAGAYAN ng mga kasulatan noong panahon ni Hesus. Una, sinabi natin na WALA PANG BIBLIYA noon.

Inilahad din natin na WALA rin noong OPISYAL na LISTAHAN ng mga tinatanggap o kinikilalang mga aklat.

Ang mga Kasulatan ay hiwa-hiwalay at nasusulat sa mga "scroll" o "kalatas."

Hindi lang ang mga Kasulatan ang hiwa-hiwalay noon. HIWA-HIWALAY rin ang mga Hudyo. Ang mga Hudyo sa labas ng Herusalem at Israel ay naroon sa tinawag na DIASPORA na ang ibig sabihin ay PINAGKALATAN dahil dito "ikinalat" ang mga Hudyo.

Ang ginamit na salita noon sa mga DIASPORA ay GRIEGO. Dahil dito dumating ang panahon na MAS MARAMI nang Hudyo ang HINDI na MARUNONG ng Hebreo.

Para mabasa pa rin nila ang mga Kasulatan, ISINALIN sa GRIEGO ang mga Kasulatan na nasa Hebreo.

Ang SALIN na ito ay TINAWAG na "SEPTUAGINT," o "SETENTA" dahil 70 dalubhasa ang nagsalin nito mula sa Hebreo.

Nagkaroon ng DALAWANG VERSION ng Kasulatan: ang nasusulat sa HEBREO at ang nasusulat sa GRIEGO.

Si Hesus at ang mga unang Kristiyano ay pamilyar sa Kasulatan sa Hebreo at sa Griego.

Pero dahil karamihan ng mga naunang Kristiyano ay mula sa mga DIASPORA, GRIEGO ang ginamit ng mga Apostol sa pagpapahayag "sa SULAT man o sa SALITA."

At dahil Griego ang gamit sa pagpapahayag ng Ebanghelyo, ang ginamit na Kasulatan ng mga unang Kristiyano ay ang SEPTUAGINT.

Sa madaling salita, ang SEPTUAGINT ang KABUOHAN ng Kasulatan na TINANGGAP at GINAMIT ng mga unang Kristiyano. Paglaon, ito ang naging batayan ng OLD TESTAMENT.

Nagalit ang mga Hudyo dahil ginagamit ng mga tagasunod ni Hesus ang kanilang mga aklat. Kaya noong 100 A.D. sa lungsod ng JAMNIA ay nagdeklara ang mga Hudyo ng mga aklat na PARA LANG SA MGA HUDYO.

ITINAKWIL ng mga Hudyo ang SEPTUAGINT na KINILALA naman ng mga Kristiyano bilang GALING SA DIYOS.

Nagkaroon ng dalawang set ng KASULATAN: ang TANAK ng mga Hudyo at ang SEPTUAGINT ng mga Kristiyano.

Ang iniwan kong tanong kahapon ay "Ano ang kahalagahan ng dalawang ‘version’" ng Kasulatang ito?

Heto ang sagot.

+ + +

Ang SEPTUAGINT ay may 46 Kasulatan. Samantala, ang aklat ng mga Hudyo ay mayroon lamang 39 aklat (Ito ay ayon na sa pagkakahati-hati ng mga Protestante).

Ibig lang sabihin nito ay MAS MARAMING aklat at kasulatan ang mga Kristiyano kaysa mga Hudyo.

Nang lumaganap ang Kristiyanismo, lumaganap din ang paggamit sa SEPTUAGINT at SA LOOB ng 1,400 hanggang 1,500 taon ay KINILALA ng LAHAT ng Kristiyano ang mga laman ng SEPTUAGINT.

Patunay na MAS KINILALA ng Panginoong Hesus at ng mga Apostol ang SEPTUAGINT ay ITO ANG GINAMIT nila nang mag-quote sila mula sa Lumang Tipan.

Sa lahat-lahat, higit sa 300 quotations ang KINUHA ni Hesus at ng mga Apostol MULA SA SEPTUAGINT.

Uulitin ko lang, sa SEPTUAGINT sila KUMUHA ng talata at HINDI sa HEBREO.

Ito ay TANDA na KINILALA ni Hesus at ng mga Apostol na GALING sa Diyos ang SEPTUAGINT.
Dahil nga si Hesus at ang mga Apostol na ang KUMILALA sa SEPTUAGINT ay KINILALA na ito ng IGLESIA na ITINATAG ni Kristo.

Ang SEPTUAGINT ang tinutukoy ni Pablo sa 2 Timothy 3:16 na "Ang LAHAT ng KASULATAN ay HININGAHAN ng Diyos at kapakipakinabang sa pagtuturo, pagsansala, pagtutuwid at pagsasanay sa katuwiran."

Kaya mula pa noong panahon ni Kristo at ng mga Apostol ay 45 na ang kasama sa Kasulatan na kinikilala natin ngayon bilang "Old Testament."

Sa loob ng 1,400 hanggang 1,500 taon ay ito ang kinilalang Old Testament ng mga KRISTIYANO.
Pero nang LUMITAW ang mga mangangaral na Protestante ay BINAWASAN nila ang Bibliya. Ang sinunod nila ay ang VERSION ng mga Hudyo.

Kung paanong ITINAKWIL ng mga HUDYO ang mga Kasulatan na KINILALA nina Hesus at ng mga Apostol, ay GANOON DIN ito ITINAKWIL ng mga PROTESTANTE.

Ngayon nga ay MARAMI na ang SUMUNOD sa PAGTAKWIL sa mga Kasulatan na TINANGGAP ni Hesus at ng IGLESIA NA ITINATAG Niya.

Kaya ISA NA NAMAN ITONG TANDA kung kayo ay NASA IGLESIANG ITINATAG ni Kristo.

Pero in fairness, MARAMI ang HINDI ALAM na ganito ang mga pangyayari. NALINLANG lang sila.

Sila ay PINAPANIWALA na may DAGDAG ang Bibliya ng mga Katoliko. Ang hindi nila alam ay may BAWAS ang Bibliya nila.

Kaya kung KULANG ang Bibliyang gamit ninyo sa ngayon ay mag-isip kayo. Tanda ‘yan na MALI ang TINANGGAP ninyong Bibliya.