Saan galing ang mga kalaban ni Kristo?

Hulyo 2, 2003

SIMPLE ang sabi ni Reyne ng Cagayan de Oro City tungkol sa pinag-uusapan natin tungkol sa iglesia na itinatag ni Kristo.

Sabi niya, "It’s very clear that there is only one true church na itinatag ni Kristo. It is Catholic. It started in 33 AD. Please study."

u u u

May tanong naman si Emel Pacatang ng Bugo Cagayan de Oro. Sabi niya, "Mr. Bibe, tunay ba na iglesia ni Kristo ang grupo ni Manalo na hindi naniniwala na si Kristo ay Diyos? Thanks and God bless."

Hindi natin layunin sa column na ito na magsalita nang direkta tungkol sa ibang grupo o sekta. Kung nagkokomentaryo man tayo, ito ay para liwanagin ang sinasabi ng iba tungkol sa mga paniniwalang Katoliko.

Kung may tanong kayo tungkol sa isang partikular na samahan, paki balikan na lang ang mga isinulat ko na at ‘yon ang inyong pagbatayan.

Salamat po.

u u u

Nag-text uli si Chat ng Project 4, QC. Noong una ay sinabi niya na "mali" raw ang lahat ng isinusulat ko sa column kong ito.

Ngayon ay ganito ang sabi niya, "Thanks sa pagkalathala mo ng message ko. Ang sabi ko "Sayang, tama ang bible verse na sinasabi mo pero iba ang pakahulugan mo sa lahat ng ito."

Tulad nga ng sagot ko sa iyo noon, Chat, okay lang kung hindi ka sumasangayon sa mga isinusulat ko. Karapatan mo ‘yon na naaayon sa kalayaan ng loob na ibinigay ng Diyos sa ating lahat.

Gusto ko lang naman ipakita ang mga bagay na hindi nakikita at hindi nakita ng maraming tao nang tingnan nila ang Katolisismo.

Tulad nga ng sabi ko noon, lubusan lang natin na magagamit ang kalayaan nating pumili kung nakita na natin ang buong larawan ng bagay na ating tinitingnan.

Sa ngayon, ang nakikita ng mga hindi Katoliko o ng mga dating Katoliko ay ang masasamang bagay na sinasabi ng kani-kanilang mga pastor, ministro o mangangaral laban sa Iglesia.

Kahit nga ngayon na ipinahahayag ko na ang katotohanan sa pananampalatayang Katoliko ay iginigiit pa rin ng ilan ang puro kamalian at kasinungalingan tungkol dito. Ano pa kaya kung walang nagsasalita para ituwid ang kamalian?

Pero sabi ko nga, hindi ko layunin ang mangumbinsi kundi ang magpahayag ng katotohanan. Pero kung mayroong gustong sumubok sa aral na pinaniniwalaan sa Iglesia Katolika ay handa akong sumagot sa mga iyon.

u u u

Sabi naman ni Jorge ng Negros Occidental, "Sa akin, isa lang ang batayan sa tunay na Iglesia at yun ang paalala sa 2 John 1:9. Paanong naging tunay ang Roman Catholic eh galit ang Diyos sa maling aral."

Para maintindihan natin ang sinasabi ni Jorge ay ganito ang sinasabi ng 1 John 1:9,

"Sino man na umuna sa pagtakbo at hindi magpatuloy sa aral ni Kristo ay wala sa kanya ang Diyos. Sino man ang magpatuloy sa aral ay nasa kanya ang Ama at ang Anak."

Napakaganda naman ng sinabi mo Jorge. Ang tanong ko na lang sa iyo ay saan ba matatagpuan ang mga aral na ito na DAPAT IPAGPATULOY?

Para natin maipagpatuloy ito, hindi ba kailangang malaman natin ang pinagmumulan nito? At ayon sa Bibliya, ang aral ay nasa Iglesia na itinatag ni Kristo.

Hindi nga ba, sa 1 Timothy 3:15 ay ganito ang sinasabi,

"Kung ako ay matatagalan, sinusulatan ko kayo para malaman ninyo kung paano kumilos sa tahanan ng Diyos, ang Iglesia ng buhay na Diyos, ANG HALIGI at SALIGAN ng KATOTOHANAN."

Ibig sabihin kung noong unang panahon pa nasulat ang mga salita sa Timothy, ang tinutukoy na Iglesia ay naroon na noong panahon na iyon.

Kaya nga ang sabi ko ay alamin natin kung anong iglesia na narito ngayon ang mati-trace natin pabalik sa unang iglesia dahil tiyak na ‘yon ang TUNAY.

Huwag nating isipin ang sinasabi ng kung sinu-sino. Alamin muna natin ang iglesia na ito na itinatag ni Kristo at sinasabi sa Bibliya na "Haligi at Saligan ng Katotohanan" at doon tayo magsimula.
Kasi kung "mali" ang Iglesia na iyon ay ano pa ang totoo? Tama ba?

Ngayon, kung ‘yang sinasamahan mong grupo ang mati-trace mo pabalik kay Kristo at sa mga Apostol, eh ‘di maganda. Salamat sa Diyos.

Ngayon, kung hindi naman ay mag-isip-isip kayo dahil baka isa na ‘yan sa mga itinatag ng mga "huwad na kristo" at huwad na mangangaral" na ang layunin ay siraan ang TUNAY na Iglesia at iligaw ang mga kasapi nito.

Tingnan ninyo ang sinasabi ng 1 John 2:18-19,

"Mga anak, ito na ang huling oras at narinig na ninyo na parating ang anti-kristo at kahit ngayon ang mga anti-kristo ay dumating na."

"Lumabas sila mula sa atin pero hindi talaga sila naging bahagi natin. Dahil kung naging bahagi sila sa atin nanatili sana sila sa atin. Ang pag-alis nila ay nagpapakita na wala sa kanila ang naging sa atin."

Dito ay makikita ninyo na ang kalaban ni Kristo ay "LUMABAS" mula sa tunay na Iglesia. Sila ngayon itong nagkakalat ng maling aral laban sa Iglesia na itinatag ni Kristo.

Kaya kung pag-aaralan nating mabuti, ang tunay na Iglesia ay dati nang nariyan. (Kasi nga ay una na itong itinatag ni Kristo)

Ngayon, ang mga kalaban ni Kristo at ng Iglesia ay galing din naman sa loob ng tunay na Iglesia.

Diyan pa lang ay makikita na ninyo na kung ang isang grupo ay humiwalay lang ay malamang na hindi ito ang totoo.

Ang mas masaklap ay kung ang isang grupo ay humiwalay lang sa dati nang humiwalay. Ano na ang tawag doon? Hindi ba?

Nawa ay matagpuan n’yo ang katotohanan at ang tunay na Iglesia ni Kristo.

Ano ang mga tanda ng Iglesiang itinatag ni Kristo?

Hunyo 15, 2003

KAHAPON ay sinumulan nating pag-usapan ang mga tanda para makilala ang Iglesia na itinatag ng Panginoong Hesu Kristo rito sa lupa.

Sabi ko nga kahapon, ang Iglesiang itinatag ni Kristo ay IISA. Although maraming kalat-kalat na iglesia o simbahan kahit noong unang panahon, ang mga ito ay kasama sa IISANG KATAWAN ni Kristo.

May sinasabi ang 1 Corinthians 12:12-13 na ganito,

"Ang katawan ay IISA kahit pa ito ay binubuo ng maraming bahagi; at kahit marami ang mga bahagi nito, bumubuo sila ng IISANG KATAWAN. Ganoon din kay Kristo."

"Dahil tayong lahat ay bininyagan ng IISANG ESPIRITU sa IISANG KATAWAN - maging Hudyo o Griego, alipin o malaya - at tayo ay binigyan ng iisang Espiritu para inumin."

ISA LANG ang Kanyang itinatag kaya nga ISA LANG ang Iglesia na KATAWAN ni Kristo.

Sabi nga sa Ephesians 4:4-5,

"May IISANG KATAWAN at iisang Espiritu - kung paanong kayo ay tinawag sa iisang pag-asa noong kayo ay tawagin - IISANG PANGINOON, IISANG PANANAMPALATAYA, iisang binyag."

Ang lahat ng iba pang "iglesia" na nagsulputan ay tatag na lang ng kung sinu-sinong tao - at baka pa tatag ng mga huwad na kristo at huwad na propeta. At 'yon ang nakakatakot.

Kaya puwede nating itanong: Ano ba itong Iglesia na kalat at maraming bahagi pero IISA pa rin?

Pero hindi lang ito ang "tanda" ng Iglesia na itinatag ni Kristo. Ang susunod ay ang nabanggit ko kahapon kaugnay ng Matthew 16:18 na ang sabi,

"At sinasabi ko sa iyo na ikaw ay PEDRO at sa ibabaw ng batong ito ay itatatag ko ang aking Iglesia na ang mga pinto ng Hades ay hindi mananaig dito."

Itinatag ng Panginoon ang Kanyang Iglesia kay PEDRO, ang pinuno ng mga Apostol. Ibig lang sabihin niyan ay MAY KAUGNAYAN ang Iglesiang itinatag ni Kristo sa Apostol na si Pedro. Kung wala, hindi ito ang itinatag na Iglesia ni Hesus.

Pero hindi lang kay Pedro may kaugnayan ang tunay na Iglesia ni Kristo. May kaugnayan din ito sa lahat ng iba pang Apostol.

Ganito ang sinasabi ng Ephesians 2:19-21,

"Kaya nga, hindi na kayo mga dayuhan o kaiba pero kasama na sa sambayanan ng Diyos at miyembro ng Kanyang sambahayan na ITINAYO sa pundasyon ng mga APOSTOL at mga propeta, na si Kristo Hesus ang pangunahing batong panulukan."

"Sa kanya ang buong gusali ay binuo at itinatayo para maging banal na templo ng Panginoon."

Ang kaugnayan na ito sa mga Apostol ay tinatawag na APOSTOLICITY ng Iglesiang itinatag ni Kristo. Sa madaling salita, ito ay mati-trace pabalik sa mga Apostol, partikular kay Pedro.

At dahil sinabi ng Panginoon na hindi pananaigan ng "Hades" o ng kamatayan ang Iglesia, ibig lang sabihin na mula noon hanggang ngayon ay nagpapatuloy ang Simbahan.

Dito pa lang ay maaari na ninyong malaman ang Iglesia na itinatag ni Kristo. Kasama ang "tanda" na ang Iglesia ay ISA, ay tatanungin lang ninyo kung ano itong Iglesia na may kaugnayan kay Pedro at sa mga Apostol.

Kumuha lang kayo ng history book at tingnan kung anong simbahan ngayon ang may kasaysayan na babalik sa panahon ni Hesus at ng mga Apostol ay may ideya na kayo.

Pero hindi pa tayo tapos. Dahil mayroon ibang "tanda."

Noong paakyat na sa Langit ang Panginoong Hesus, nagbilin Siya sa Kanyang mga Apostol at mga alagad. Mababasa natin ito sa Matthew 28:19 na ang sabi,

"Kaya humayo kayo at gawing disipulo ang LAHAT NG BANSA, binyagan ninyo sila SA NGALAN ng AMA, ng ANAK at ng ESPIRITU SANTO."

Ginusto ni Kristo na maging pangmalawakan o "universal" ang Kanyang Iglesia. Sa Griego, ang salitang katumbas ng "universal" ay "katolikos" kung saan kinuha ang salitang "Catholic."

Ang pagiging "universal" o "catholic" ng Iglesia ay bilang pagtupad sa kautusan ng Panginoon. Sabi nga sa Acts 13:47,

"Ito ang iniutos sa amin ng Panginoon, 'Ginawa kitang liwanag para sa mga Hentil para madala mo ang kaligtasan sa mga DULO NG DAIGDIG."

Dito makikita natin na ang pagiging "catholic" ng Iglesia ay mahalaga para sa kaligtasan. Kung hindi ito ikakalat sa "mga dulo ng daigdig" o hindi ito magiging "catholic," hindi maririnig ang Mabuting Balita ng pagliligtas.

Ang pang-apat na tanda ang pinakamahalaga dahil ito ang nagbibigay ng katiyakan na ang Iglesiang ito ay tunay at ang mensahe nito ay totoo ngang nagliligtas.

Ang pang-apat na tanda ay "BANAL" ang Iglesia.

Ganito nga ang sabi sa Ephesians 5:25-26,

"Mga lalaki mahalin ang inyong mga asawa kung paanong minahal ni Kristo ang iglesia at ibinigay ang kanyang sarili para sa kanya upang gawin siyang BANAL."

Dito ay makikita natin na ang Iglesia ay "BANAL" dahil sa ginawa ni Kristo na pagbibigay ng Kanyang sarili para rito.

Sa madaling salita, BANAL ang Iglesia hindi dahil "banal" ang mga miyembro nito kundi dahil sa pagliligtas na ginawa rito ng nagtatag sa kanya. Ang kabanalan ng Iglesia ay dahil iniligtas ito ni Kristo.

Ganito pa ang sabi sa Hebrews 13:12,

"At si Hesus ay nagdusa sa labas ng pintuan ng lungsod para gawing BANAL ang mga tao sa pamamagitan ng SARILI NIYANG DUGO."

So, mayroong apat na "tanda:" Ang Iglesiang itinatag ni Kristo ay ISA, APOSTOLIKO, KATOLIKO at BANAL. Mahahanap na ba ninyo ang Iglesiang ito?

Nasaan na ang Iglesiang itinatag ni Kristo?

Hunyo 14, 2003

NITONG mga nakaraang mga Sabado at Linggo ay tinalakay natin ang Iglesia o ang Simbahan.

Nito ngang nakalipas na Linggo ay ipinakita ko na naka-ugat ang konsepto ng Iglesia sa karanasan ng mga Hudyo nang sila ay tawagin at tipunin ng Panginoong Diyos mula sa pagkakaalipin sa Ehipto.

Sa pagdating ng Panginoong Hesus ay tinawag at tinipon Niya ang Kanyang kawan at ito na nga ang pinagmulan ng Kristiyanong Iglesia o Simbahan. Sa madaling salita, ang Iglesia ay ang "Bayan na Tinawag at Tinipon ni Kristo."

Kung titingin tayo sa ating kapaligiran ay mapupuna natin na napakaraming grupo ang nagsasabing "Church" sila o "Iglesia" o "Assembly" o "Fellowship" ng Diyos. Sa madaling salita, marami ang nagpapakilalang "tunay" na "Bayan ng Diyos."

May mga nagsasabing "pare-pareho" lang naman ang mga iyan. Iisang Diyos din naman daw ang sinasamba sa mga ito kaya puwede tayong maging miyembro ng kahit na ano sa kanila.

Samantala, mayroon din namang nagpupumilit na "sila lang" ang maliligtas dahil sila ang "totoo" at nasa kanila ang "tunay at busilak" na aral ng Diyos.

Sa totoo lang ay marami ang nalilito. Kaya nga marami ang nagpapalipat-lipat ng samahan o simbahan. Pilit nilang hinahanap ang "tunay."

Makalipas ang halos 2,000 taon mula nang tawagin, tipunin at itatag ni Kristo ang kanyang Iglesia at nagsulputan ang iba't-iba at sari-saring grupo ay tama ba na sumang-ayon na lang tayo na "pare-pareho" ang mga "iglesia?"

Kung pagbabatayan natin ang Banal na Kasulatan ay maliwanag na "hindi" ang sagot. Hindi pare-pareho ang mga nagsulputang mga "iglesia."

Ganito ang sabi ng Panginoon sa Matthew 16:18,

"At sinasabi ko rin sa iyo: Ikaw ay Pedro at sa ibabaw ng batong ito ay ITATAYO KO ANG AKING IGLESIA."

Ang itinayo ni Kristo ay iisang "Iglesia." Hindi Niya sinabing "itatayo ko ang aking mga iglesia." At although maraming iba't-ibang iglesia na binabanggit sa Bibliya, ang lahat ng ito ay bahagi ng iisang Katawan at Kawan ni Hesus.

Ganito naman ang sabi sa John 10:16,

"Mayroon akong ibang mga tupa na wala sa kawang ito. Sila rin ay dapat kong dalhin at diringgin nila ang aking tinig. At MAGKAKAROON NG ISANG KAWAN AT ISANG PASTOL."

So kung marami ang nagsasabi na sila ay "iglesia" o "simbahan" o "bayan ng Diyos," hindi siguro lahat sila ay nagsasabi ng totoo. Ang lalabas ay isa lang sa kanila ang tunay at ang lahat ng iba pa ay nagkukunwari na lang.

Tugma ito sa babala ni Hesus sa Matthew 24:24,

"Dahil lilitaw ang mga huwad na kristo at huwad na propeta at magpapakita sila ng kamangha-manghang tanda at himala para linlangin maging ang mga pinili - kung iyon man ay maaari."

Idinagdag pa Niya sa verse 25,

"Tingnan ninyo, sinasabi ko na ito bago pa ang panahon na iyon."

So, noon pa man ay nag-warning na ang Panginoon na marami ngang magpapakilala na nasa kanila ang kaligtasan. Pero ano ang sabi Niya sa Matthew 24:23,

"Sa panahon na iyon kung may magsasabi sa inyo ng "Tingnan ninyo, narito si Kristo!" o "Naroon siya!" huwag kayong maniniwala."

Ito ay dahil nga pilit na ililigaw ang mga miyembro ng Iglesia na itinatag ni Kristo.

Kung ganoon, paano natin malalaman kung alin sa mga "iglesia" o "simbahan" ngayon ang tunay na Iglesia na itinatag ni Kristo?

Ang kasagutan ay makikita natin sa pag-aaral ng Banal na Kasulatan at sa pag-aaral ng kasaysayan.

Una ay tingnan natin ang mga sinasabi ng Bibliya tungkol sa Iglesiang ito. Simulan natin sa mismong pagtatatag na ginawa ng Panginoon. Babalikan natin ang sinasabi sa Matthew 16:18,

"At sinasabi ko rin sa iyo: Ikaw ay Pedro at sa ibabaw ng batong ito ay ITATAYO KO ANG AKING IGLESIA."

Ang Iglesiang itinatag ni Kristo ay itinayo Niya sa "ibabaw ng batong si Pedro." Ang ibig sabihin kasi ng "Pedro" ay "Bato." At ang pangalang ito ay ibinigay mismo ni Kristo sa pinuno ng Kanyang mga Apostol.

Pansinin natin na ang orihinal na pangalan ni Pedro ay Simon. Pero sa Matthew 16:18 ay kasabay ng pahayag ni Hesus na magtatatag Siya ng Kanyang Iglesia ay binago Niya ang pangalan ni Simon.

Mula nga noon ay tinawag na ang Apostol na Simon Pedro o Simon Bato.

Sa pangalawang bahagi ng Matthew 16:18 ay sinabi ni Hesus,

"At ang pintuan ng Hades [o Impiyerno] ay hindi mananaig dito."

Sa karugtong ng pahayag tungkol kay Pedro at sa pagtatatag ng Iglesia ay sinabi ni Hesus na hindi pananaigan ng "Hades" o ng impiyerno ang Kanyang Iglesia.

Dalawa ang ibig sabihin nito. Una ay hindi puwedeng manaig ang kasamaan sa Iglesia. Ang Hades kasi ay lugar ng kaparusahan para sa mga makasalanan.

Ang pangalawang ibig sabihin ng talata ay hindi mananaig ang "kamatayan" sa Iglesia o hindi ito mawawala. Ang itinatag na Iglesia ni Kristo ay pang habang panahon.

Kaya mula sa mga panimulang talata na ito ay makikita na natin na ang tunay na Iglesia ni Kristo ay itinatag kay Pedro at nananatili mula noon hanggang ngayon.

Diyan pa lang ay malalaman na natin kung ano sa mga Iglesia ngayon ang tunay. Pero bukas na natin pag-uusapan iyan.