May ipinapatay ba ang Iglesia Katolika?

HULYO 29, 2003


Ganito ang text ni Dan ng Cebu, "Sana magkaharap kayo ni Bro.Eli ng ADD sa isang parehas at maginoong debate ukol sa inyong paniniwala para sa kaliwanagan ng marami. Puwede ba?"

Tulad ng sinabi ko nung simulan namin ni AJ Reyes ang "debate" rito sa TUMBOK, ang layunin ko ay MAGPALITAN ng PALIWANAG.

May mga napanood na akong debate ni Bro. Eli at HINDI MAGANDA ang impression ko sa mga ito.

Wala namang nare-resolve dahil kung hindi daanin sa SIGAWAN at KUYUGAN ay sa INSULTUHAN nauuwi.

Kaya nga mas gusto ko na dito na lang sa column na ito magkaroon ng PALITAN ng PALIWANAG.

Dito kasi, maibibigay ng lahat ang gusto nilang sabihin. NASUSULAT at MADALING balik-balikan ng mga nagbabasa.

Straight to the point din ang mga pagtalakay dahil WALANG KASAMANG INSULTUHAN. Kung magkakaroon man ay MAKIKITA AGAD ng mga READERS.

MAS MADALI ring MAIKUKUMPARA ng mga readers ang mga sinasabi ng mga nagpapalitan ng paniniwala.

Puwede nilang ikumpara PUNTO-POR-PUNTO.

Hindi lang ‘yon. WALA RING KANTIYAWAN NA MANGYAYARI kaya WALANG GUGULO sa mga talakayan.

Kaya kung papayag si Bro. Eli (hindi ko lang alam kung may personalidad ka para magsalita para sa kanya) ay dito sa TUMBOK natin gawin ang palitan ng paliwanag.

Salamat.

+ + +

Ganito ang tanong ni Drake ng Iloilo, "Mr. Bibe pakisagot ito, bakit ikinakasal ng mga pari ang homosexual, binibendisyunan ang mga sundalong papunta sa giyera?"

HINDI NAGKAKASAL ng mga homosexual ang mga paring KATOLIKO.

Marahil ang binabanggit mo ay ‘yung isang tao na nagpapakilalang "Father John" na nagkakasal ng mga homosexual at lesbiana.

HINDI SIYA PARING KATOLIKO. ‘Yon lang.

Ang pagbebendisyon naman sa mga sundalo ay HINDI PAGBEBENDISYON para maging magaling silang mamamatay tao.

Ang bendisyon ay paghingi ng PROTEKSYON ng Diyos para MALIGTAS ang kanilang buhay. Mga tao pa rin naman kasi ang mga sundalo na naghahangad ng proteksyon ng Diyos.

Hindi porke binibendisyunan sila ng pari ay nangangahulugan na sumasangayon ang pari sa giyera. HINDI ‘YON GANOON.

Isa pa, hindi naman nagsusundalo ang isang tao para pumatay.

Ang pangunahing gawain ng isang sundalo ay PANGALAGAAN ang KAPAYAPAAN at ILIGTAS ang bayan at ang mga mamamayan kung kinakailangan.

Kung mayroon mang mga sundalong pumapatay, hindi ‘yon sinasangayunan ng Iglesia Katolika. Hindi rin para roon ang bendisyon.

+ + +

Sabi naman ng reader na nagpapakilalang si Timoteo Pablo ng Quezon City, "Ke marami ke konti, may mga ipinapatay ba ang ICAR o wala? Paki sagot lang po."

"Kung walang ipinapatay ang ICAR, bakit humingi ng tawad ang Papa sa Roma dahil sa mga ipinapatay o pinatay ng ICAR."

Ang simpleng sagot, Timoteo Pablo, ay WALA.

Paanong nagpapatay ang Iglesia Katolika Romana Apostolika? Ang ibig sabihin kasi nuon ay LAHAT ng Katoliko ang nagpapapatay.

Nililinlang natin ang ating sarili kung iisipin natin na ang pagpatay (kung meron mang pagpatay) ng isang tao o isang grupo sa loob ng isang iglesia ay pagpatay ng LAHAT ng miyembro ng iglesia na ‘yon.

Ibig mong sabihin, kapag NAGMURA ang isang puno ay NAGMURA na LAHAT ng mga miyembro niya?

Mag-ingat sana tayo sa ganyang mga pahayag dahil baka HUMUHUSGA na tayo ng MALI.

Baka hindi natin alam ay HINUHUSGAHAN na natin ang LAHAT ng tao, maging yung mga WALANG KASALANAN. Kaya mag-ingat tayo.

Sabi nga ng Panginoon sa Matthew 7:2 ay HUHUSGAHAN KA kung paano ka HUMUSGA ng iba.

Sana ay NAUUNAWAAN mo ang sinasabi mong "humingi ng tawad" ang Santo Papa.

Ang paghingi ng tawad ni Pope John Paul II ay para sa mga kasalanang nagawa ng ILANG Katoliko o miyembro at HINDI NG LAHAT ng Katoliko. Sana ay maging madaling intindihin ‘yon?

‘Patunay’ na ‘kriminal’ ang mga Santo Papa

Hulyo 11, 2003

NOONG Lunes, ipinangako ko sa inyo na paguusapan natin ang tinatawag na "Holy Inquisition."

Naisip kong talakayin ito dahil marami tayong readers na nagti-text at nagsasabi na "mamamatay tao" ang maraming Santo Papa. At sa aking karanasan, ang "Holy Inquisition" ang madalas na ginagamit na batayan sa ganitong pagbibintang.

Ano ba ang "Inquisition" na ito? Ano ang sinasabi tungkol dito? At sinu-sino ang mga nagbibigay ng kuwento ukol dito?

Unahin natin ang "maling balita" o sinasabi ukol sa "Holy Inquisition."

Ayon sa mga nagkukunwaring "historian," ang "Holy Inquisition" ang "pinakamasama" at pinakamalupit" na krimen sa ngalan ng relihiyon.

Ito rin daw ang ginamit ng Iglesia Katolika at ng mga Santo Papa para patayin at lipulin ang mga kaaway nila.

Sabi naman sa ilang kuwentista ay mula 5 milyon hanggang 50 milyon ang binitay nang dahil sa "Inquisition!"

Ang lahat ng ito, ayon sa karamihan ng nagpapakilalang "historians" ay dahil galit ang Simbahan at ang Papa sa mga Hudyo, Muslim at hindi Katoliko.

Ito raw ang "patunay" na "hindi tunay na sa Diyos ang Iglesia Katolika."

Sinasakyan ng mga mangangaral (daw) ang mga kuwentong ito para patunayan na "masasama" ang mga Papa. Patunay raw ito na "kriminal" ang mga ito.

Sa loob ng maraming taon ay inulit-ulit ang mga kuwentong ito at marami ang kanilang napaniwala.
Pero may katotohanan ba ang mga ito?

WALA. Kung mayroon man silang nasabing totoo ay dapat itong tingnan uli.

Karamihan sa mga sinasabi kaugnay nito ay imbento lang ng mga kaaway ng Iglesia, partikular ng mga sumusuporta sa tinatawag na "Protestant Reformation."

Kaya kung mababasa ninyo ang mga sulat o kuwento ng mga ito kaugnay sa "Holy Inquisition" ay masama ang halos kabuohan nito. Wala halos kayong makikitang mabuti na ginawa ang Iglesia at ang mga Papa.

Pero kung babasahin natin ang mga sulat ng mga tunay na historian na walang interes kundi ang katotohanan ay makikita natin na mali ang mga pinagsasasabi ng mga "kuwentista" na pinagbabatayan ng mga bagong sulpot na mangangaral.

Pero ano pa nga ba ang pagbabatayan ng mga kaaway ng Iglesia kundi ang mga kuwento ng mga galit din sa Iglesia? Ang problema lang ay hindi na katotohanan ang kanilang sinasabi kundi puro na rin lang haka-haka.

Sa pagtutuwid, ano ba ang tinatawag na "Holy Inquisition" at bakit nagkaroon nito?

Mayroong tatlong panahon ng "Inquisition." Una ay nagsimula noong 1184 sa southern France kung saan umusbong ang maling aral ng mga "Catharist" na marahas na tumuligsa sa tunay na aral Kristiyano.

Dahil sa mga maling aral ay maraming lokal na opisyal at mga taumbayan ang nagalit. Inusig nila ang mga "Catharist" na tinawag na mga heretiko. Pinatay ang marami rito na hindi man lamang naihaharap sa imbestigasyon.

Marami ring hindi heretiko ang napatay nang walang dahilan.

Nang makarating ito kay Papa Innocent III ay nasimulan ang ugat ng "Inquisition." Iniutos niya ang pag-iimbestiga para makilala kung sino ang heretiko at kung sino ang hindi.

Pero si Pope Gregory IX ang tunay na nagpasimula ng "Inquisition" nang magtalaga siya ng mga "inquisitors" na siyang titingin kung tunay nga o hindi na heretiko ang isang tao.

Dahil dito, libu-libo ang naligtas sa maling bintang at sa tiyak na kamatayan.

Sa madaling salita, ang "Inquisition" ay nagligtas sa mga tao, hindi nagpahamak sa kanila. Itinatag ito para hadlangan ang "injustice" at hindi para gumawa nito.

Kung mayroon mang nakulong o nabitay, ito ay dahil sa pagmamatigas sa maling aral. Hindi rin ang Iglesia ang nagpabitay sa kanila.

Ang mga napatunayang heretiko ay ipinaubaya sa mga lokal na opisyal na siyang nagbigay ng parusa sa ayon sa lokal na batas. Ang mga "inquisitor" ay walang kapangyarihang magparusa.

Natapos ang "Inquisition" sa France nang matapos ang heresiya ng Catharist noong ika-14 century. Hindi lalampas sa 100 ang nahatulang mamatay.

Ang pangalawang "Inquisition" ay ang "Spanish Inquisition" noong 1478 na biktima ng pinakamalaking kasinungalingan.

Ito ang sinasabi ng mga kaaway ng Iglesia na "pinakamalupit" at "pinakamaraming ipinapatay."

Pero noong 1994 ay ipinakita sa imbestigasyon na ginawa ng British Broadcasting Company na "huwad" ang mga bintang na ito.

Ipinakita ng BBC na ito ay gawa-gawa ng mga Protestante para siraan ang Iglesia sa mga taga-Europa at maisulong ang bago nilang paniniwala.

Totoong may ilang pag-abuso na nangyari pero hindi kasing sama at lawak ng inimbento ng mga Protestante.

Sinasabi ng mga "kuwentista" ng kaaway na inilunsad ang "Spanish Inquisition" para lipulin ang mga Hudyo at Muslim pero hindi ito totoo.

Ang katotohanan ay nilabanan lang ng "Inquisition" ang mga taong nagkukunwaring Kristiyano o mga Hentil na ginagamit sa negosyo ang Iglesia.

Ayon pa sa Hudyong historian na si B. Netanyahu ay ang punong "inquisitor" na si Tomas de Torquemada ang pumigil sa maling pag-uusig sa mga Muslim at Hudyo.

Walang ipinapatay na milyun-milyon. Sa katunayan, gumawa ng paraan si Torquemada para mabigyan ng pagkakataon ang mga tao na makaiwas sa kapahamakan.

Sayang lang dahil hindi natin mailagay ang lahat ng detalye para maipakita ang kasinungalingan ng mga nagpasama sa "Inquisition."

Pero isa ang tiyak, ang gumagamit sa kasinungalingan ay walang karapatan.

Hanggang sa susunod.