Diyos ng Kristiyanoat Muslim pareho ba?

Marso 22, 2003

NAG-TEXT sa akin si John Catada ng Davao City. Mayroon siyang tanong tungkol kay Yahweh at kay Allah.

Mayroon daw kasing nagsasabi na "si Allah at ang Diyos ng mga Kristiyano ay pareho lang."

Itinatanong niya kung ano ang masasabi natin rito.

Isa ang tiyak na tiyak ako. Ang mga Kristiyano at mga Muslim ay parehong naniniwala sa iisang Diyos. Wika nga sa Ingles ay pareho silang "monotheistic."

Ang ibig sabihin ng "mono" ay isa at ang "theistic" ay tumutukoy sa diyos.

Sa pagkakaalam ko ay tinatawag nila ang Diyos ng "Allah."

Ang tawag naman ng nakararaming Kristiyano sa Diyos ay "Yahweh."

Gusto ko sanang talakayin pa ang pagkakaiba o pagkakapareho ng "Allah" at "Yahweh" pero wala tayo sa posisyon na magbigay ng komento tungkol kay "Allah."

Pareho lang ba sila o magkaiba?

Although hindi tayo magkokomento tungkol kay "Allah," puwede tayong magkomento tungkol sa nakikita nating "pagsunod" ng ilang Muslim sa umano’y sinasabi ng kanilang pananampalataya.

Dito ay sasabihin ko na ang mga mababasa ninyo ay ang "interpretasyon" ko at ng ibang tao patungkol sa paniniwala ng mga Muslim.

Hindi tayo gagawa ng isang paglalahad ng kanilang pananampalataya. Sa madaling salita, "obserbasyon" lang ang ating gagawin.

Kung magkamali man tayo ay dahil ‘yon ang nakikita natin base sa ginagawa ng ilang Muslim. Hindi natin hinuhusgahan ang lahat ng kasapi ng Islam.

Okay, sisimulan ko sa pagsasabi na "iba" ang paniniwala ng mga Kristiyano sa nakikita nating pagsunod ng ilang Muslim sa kanilang paniniwala.

Halimbawa, nakikita natin ang mga tulad ni Osama bin Laden na nagsasabi na puwedeng gumawa ng terorismo ang mga Muslim dahil ito raw ay "utos ni Allah."

Puwede bang gamitin ng isang Kristiyano ang pangalan ng Diyos o ang Diyos para hikayatin ang iba na gumawa ng terorismo o pagpatay?

Hindi. Ang paniniwala kasi natin sa Diyos ay Siya ay Diyos ng Pagmamahal at Diyos ng Awa.

Sa mula’t-mula pa ay ipinakikita sa Bibliya na si Lord ay isang Diyos na nagmamahal sa tao.

Sa Genesis chapter 2 ay mababasa natin na ginawa Niya si Adan at Eba sa pamamagitang Kanyang mga kamay.

Ang hininga ng tao ay galing mismo sa bibig ng Diyos. at sinasabi sa Bibliya na ganoon kamahal ng Diyos ang tao.

Oo nga, dumating ang pagkakataon na pinarusahan ng Diyos ang tao, tulad nang palayasin Niya sina Eba at Adan mula sa Hardin ng Eden.

Niloob din ng Diyos na bumaha sa mundo at mamatay ang lahat liban sa pamilya ni Noah.

Nagalit din ang Diyos at nagpaulan ng apoy sa mga bayan ng Sodom at Gomorrah.

Ipinakita lang na galit ang Diyos sa mga makasalanan.

Pero kung susundan natin ang buong "salvation history" at dadako tayo sa New Testament ay makikita natin na ang Diyos natin ay tunay na mapagmahal.

Sa sobrang pagmamahal ng Diyos sa mga nilikha niyang tao ay dumating ang pagkakataon na Siya mismo ay nagkatawang tao. Ito nga ang Panginoon nating si Hesus.

Sa mga aral ni Lord Jesus, ginawa Niyang klaro ang mga kautusan na ibinigay sa Lumang Tipan.

Sinasabi ng mga tulad ni Osama bin Laden na ang pagpatay sa mga sibilyan -- kasama na ang mga bata at babae -- ay bilang parusa sa kanilang mga "kasalanan."

Ang aral ng Panginoong Hesus ay "mahalin" at "igalang" maging ang mga nakakagawa ng pagkakamali.

Sa katunayan, kaya nga Siya nagkatawang tao ay para maibalik sa Diyos ang mga taong naliligaw.

Sa paniniwala nating mga Kristiyano, hindi tayo ang gagawa ng pagpaparusa kundi ang Diyos. At ‘yan ay pagdating ng araw ng paghuhukom.

Kung maniniwala tayo sa sinasabi at ipinapakita ng mga taong tulad ni Bin Laden at ng mga Abu Sayyaf, sinasabi nila na sila ang magpaparusa sa ngalan ni "Allah."

Kung ‘yon nga ang tunay na aral ng Islam o hindi ay mga Muslim na lang ang makapagsasabi.

Pero kung mali man ang nakikita natin at mali man ang interpretasyon natin sa Islam at kay "Allah," sana ay maintindihan ng mga tunay na Muslim na hindi natin ito ginusto.

Personally, ang alam ko kasi ay relihiyon ng kapayapaan ang Islam.

Hindi ko lang maintindihan kung bakit nagkakaroon ng mga Muslim na tulad ni Osama at ng Abu Sayyaf.

At base sa mga nakikita natin ay sinasabi natin na malaki ang pagkakaiba ng Diyos ng mga Kristiyano at ng mga Muslim.