October 20, 2002
NOONG isang linggo ay ipinakita ko na ang Panginoong Hesus ay siya ring si
Yahweh. Ito ay sa pamamagitan ng pagpapakita ko na ibinigay at ginamit para sa
Kanya ang pangalan ng nag-iisang Diyos.
Sabi ko nga, noong unang panahon ay natakot ang mga Hebreo na tawagin ang
Diyos sa pangalan nitong “Yahweh.” Hindi raw kasi karapat-dapat na banggitin ng
makasalanang labi ang busilak na pangalan ng Maykapal.
Imbes na banggitin ang “Yahweh,” ginamit nila ang titulo na “Adonai” na ang
katumbas sa Ingles ay “Lord” at “Panginoon” naman sa Pilipino. Tingnan ang
halimbawa sa Exodus 15:3, “Ang Panginoon ay isang mandirigma, PANGINOON ang
Kanyang pangalan.”
Sa Bagong Tipan na unang isinulat sa Griyego at sa Lumang Tipan na salin sa
Griyego, ang “Adonai” ay isinalin bilang “Kyrios.” Ibig sabihin, ang “Yahweh” ay
katumbas ng “Adonai” sa Hebreo at katumbas din ng “Kyrios” sa Griyego.
Itong titulo na “Kyrios” na tanging sa Diyos lang ginamit ng mga unang
Kristiyano ay siya ring ginamit na titulo para kay Hesus. Isang patunay rito ang
John 14:5 nang magsalita si Tomas at sinabi kay Hesus, “PANGINOON (Kyrios) ko at
Diyos ko!”
Sa tamang pagbabasa ng Bibliya ay malinaw ang paghahayag na si Hesus ay
Diyos, pero bilang Diyos ay may sariling persona na hiwalay sa persona ng Diyos
Ama. Sa ibang salita ay dalawa silang persona ng iisang Diyos.
Pero hindi rito tumitigil ang pahayag ng Bibliya tungkol sa Diyos na ating
kinikilala. Sa Matthew 28:19, ipinapakita na hindi lang ang mga persona ng Diyos
Ama at Diyos Anak ang gumagamit ng pangalang “Yahweh,” “Adonai” o “Kyrios.”
Sinasabi ng talata, “Humayo kayo at gawing disipulo ang lahat ng bansa.
Binyagan ninyo sila sa NGALAN ng Ama, at ng Anak at ng Espiritu Santo.”
Malinaw sa talata na maging ang Espiritu Santo ay kinikilala rin sa iisang
pangalan na angkin ng Ama at Anak. Sa madaling salita, ang Espiritu Santo ay
nakikiisa rin sa pagka-Diyos ng Diyos manapat may taglay itong sariling
persona.
Sa gustong umintindi, madaling makikita na iisa ang Diyos na may tatlong
indibidwal na persona. ’Yan ang tinatawag sa mga Katoliko Kristiyano na Doktrina
ng Banal na Sangtatlo o Holy Trinity
No comments:
Post a Comment