Pasko, selebrasyon ng mga pagano?

Disyembre 26, 2002

KUMUSTA ang inyong pagdiriwang ng Pasko?

Ano? Walang gaanong regalo at walang gaanong handa?

Medyo “tuyo” nga ano? Although mas okay sana kung marami tayong pera, regalo at tsibog nitong Christmas Day, kung tutuusin ay wala naman talaga sa mga ‘yan ang dahilan kung bakit tayo nagdiriwang ng Pasko.

Ang diwa ng Pasko ay makikita natin sa John 3:16. Sabi roon,

“Ganoon na lang ang pagmamahal ng Diyos sa sanlibutan na ibinigay Niya ang Kanyang bugtong na anak upang sino man ang maniwala sa Kanya ay hindi mapahamak kundi magkaroon ng buhay na walang hanggan.”

Ang ganda, hindi po ba?

SI HESUS ANG PASKO

Pero sa kabila nga ng kagandahang ito ng Pasko, maniniwala ba kayo na may mga tao na nagsasabi na ang Pasko ay “para sa mga pagano?”

Sa kolum ko noong Disyembre 24, ipinakita ko na ang Pasko ay nasa Bibliya. Ito ay tumutukoy kay Lord Jesus na siyang “Paschal Lamb” o Kordero ng Pascua na siyang nagliligtas ng kasalanan ng sanlibutan. Nakasulat ‘yan sa Juan 1:29.

Ang salitang Pasko ay galing sa “Pascua” na salitang Kastila. Kaya nga sinasabi ko na “Si Hesus ang Pasko.” At ang kumontra sa Pasko ay kumukontra kay Hesus.

Ipinakita ko rin kung paano mauugat ang petsang Disyembre 25 mula sa kuwento ng kapaskuhan ayon sa Ebanghelyo ni San Lucas.

Ngayon ay sasagutin ko ang pakulo ng mga kalaban ng Pasko na ito ay isang selebrasyon ng mga pagano.

PINALITAN?

Ang iginigiit ng mga anti-Christmas ay hindi daw matutukoy kung kailan talaga ipinanganak si Hesus. (Napatunayan na natin na nagkakamali sila.) Kaya nila ito sinasabi ay para bigyang dahilan ang haka-haka nila na ipinalit lang ang Pasko sa kaarawan ng “sun god” ng mga pagano.

Pinalitan lang daw ng Simbahang Katoliko ang “birthday” ng “sun god” at ang birthday ni Hesus ang inilagay. Sa puso at isip nitong mga kalaban ng Pasko, hindi raw kaarawan ni Hesus ang Pasko kundi kaarawan ng isang diyus-diyosan.

Nakikita ba ninyo ang logic nila? Porke nagkasabay ang isang selebrasyong Kristiyano sa isang selebrasyong pagano ay sinasabi nilang pagano na rin ito. Pinalalabas nila na kayang sapawan ng kaarawan ng isang diyus-diyosan ang “birthday” ni Hesus.

Napakahina naman yata ng pananampalataya nila sa Panginoon.

Hindi totoo ang sinasabi nila na “pinalitan” lang ng Simbahan ang selebrasyon ng mga pagano. Nagkataon lang na ang kaarawan ni Hesus ay napasabay sa paniniwala ng mga pagano. Pero eh ano naman? Si Hesus naman ang ipinagdiriwang natin at hindi ang diyos ng mga pagano.

NAGKATAON LANG

Nakakaawa lang itong mga kontra sa Pasko dahil ang naaalala nila tuwing Disyembre 25 ay isang diyus-diyosan at hindi ang Diyos na nagkatawang tao.

Liban sa patunay na naka-ugat sa Bibliya, isa pang dahilan kung bakit malinaw na nagkasabay lamang at hindi ginawang pampalit ang kaarawan ng Panginoon sa kaarawan ng isang diyus-diyosan ay ang mga sulat ng mga tao noong mga unang siglo.

Isa sa kanila si Cypriano na nagsabi na “sa araw kung kailan ipinanganak ang araw … ay isinilang din si Kristo.” Ibig sabihin ay nagkataong magkasabay at hindi isinabay o ipinalit.

Si Crysostomo, isang sinaunang Kristiyano ang nagsabi, “Ang ating Panginoon ay ipinanganak din sa buwan ng Disyembre, noong [Disyembre 25]”

TAGLAMIG DAW

Isa pang pangontra ng mga anti-Christmas sa pag-alala sa kaarawan ni Hesus ay ang pagsasabi na “imposible” na Disyembre ipinanganak si Kristo dahil ito ay buwan ng “winter” o taglamig sa Bethlehem.

Tinutukoy nila ang pangyayari sa Lucas 2:8-14 kung saan may mga pastol na “nagbabantay ng kanilang tupa sa parang.” Hindi raw ito puwedeng mangyari dahil hindi ilalabas ng mga pastol ang mga tupa dahil malamig ang panahon.

Parang sinasabi nila na “imposibleng” umulan kapag summer o tiyak na tiyak na malamig kapag taglamig. Sa lahat ng tao, tayong mga Pinoy ang nakakaalam na hindi magandang basehan ng bagay-bagay ang “panahon” o weather.

Hindi pa ba kayo nakaranas ng Disyembre na ubod ng init? O kaya ay panahon ng tag-ulan na walang pumatak na ulan?

PATUNAY NG BIBLIYA

Ngayon, paano natin nalalaman na maaliwalas ang panahon noong ipanganak si Hesus? Ito kasi ang sabi ng Bibliya. Sinabi ni Lucas na noong ipanganak si Hesus ay naroon sa parang ang mga pastol at ang kanilang tupa.

Hindi ba si Lucas din ang nagbibigay ng basehan para sa paniniwala na Disyembre 25 nga ang Pasko?

Ang tanong ngayon ay mapagkakatiwalaan ba natin si Lucas.

Kung naniniwala tayo sa Bibliya, “Dapat” tayong magtiwala. Mismong si Lucas ang nagsabi sa Lucas 1:3-4,

“Ipinasya ko, matapos kong IMBESTIGAHANG TUMPAK ang lahat, na isulat nang maayos ang mga pangyayari, O Teofilo, para malaman mo ang katiyakan ng mga aral na iyong natanggap.”

Ngayon, sino ang nagsasabi ng totoo? Si San Lucas at ang Bibliya o ang mga kaaway ng Pasko?